VIKEKE, 18 Jullu 2025 (TATOLI)—Ministériu Koordenadór ba Asuntu Ekonómiku (MKAE) liuhusi ekipa traballu disemina prosesu adezaun Timor-Leste nian ba Organizasaun Mundiál Komérsiu (OMK) ba autoridade sira iha Munisípiu Vikeke.
“Iha tinan kotuk, ita formalmente OMK simu ona ita nu’udár membru plenu. Ema barak mak seidauk hatene saida mak OMK. Tan ne’e, ohin ami halo diseminasaun ba ita-nia autoridade no komunidade hodi ko’alia kona-ba ita-nia progama ba pós adezaun OMK nian,” Koordenadór Jerál MKAE, Jorge Rui de Carvalho ba jornalista sira iha Salaun Munisípiu Vikeke, Sesta ne’e.
Antes ne’e, Governu halo aliñamentu kona-ba lei sira husi autoridade lokál relasiona ho padronizasaun produtu agríkola no naun agrikultura ne’ebé sai hanesan padraun ida, molok atu tama bá merkadu sira.
“Tanba ne’e, ita presiza rona uluk autór prinsipál sira hanesan autoridade lokál, komunidade, negosiante, agrikultura no peskadór sira hodi ita halo aliñamentu. Ida-ne’e sai hanesan prosesu ida,” Jorge informa.
Notísia relevante: Timor-Leste nia adezaun ba OMK nu’udar prioridade estratéjiku
Iha fatin hanesan, Prezidente Autoridade Munisipál (PAM) Vikeke, Francisco C. S de Gonzaga Soares hato’o agradesimentu ba ekipa téknika OMK bele mai Munisípiu Vikeke hodi disemina adezaun OMK nian ba autoridade sira.
“Ha’u hato’o agradesimentu ba ekipa sira tanba bele mai divulga informasaun kona-ba OMK nian, ne’ebé Timor Leste sai ona membru. Maski ita envolve ona maibé ita presiza prepara aan hodi lori ita-nia produtu agríkola ba asesu merkadu globál sira,” nia tenik.
Partisipa iha diseminasaun ne’e kompostu husi Administradór Postu, Xefe Suku, Konsellu Veteranu Vikeke, Polísia, reprezentante partidu polítiku sira-ne’ebé hetan asentu iha Parlamentu Nasionál no komunidade.
Jornalista: Vitorino Lopez da Costa
Editór: Xisto Freitas da Piedade
