DILI, 21 Jullu 2025 (TATOLI)-Primeiru Ministru Interinu, Vise Peimeiru-Ministru no Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano Assanami Sabino, apela ba komunidade hotu atu kuidadu ambiente relasiona ho mudansa klimátika iha Timor-Leste.
“Ha’u hanoin atividade ne’e, Forum NGO mak organiza importante tebes, tanba bainhira ita ko’alia kona- isu mudansa klimátika, ita presiza rezerva ita-nia ambiente, liiliu floresta”, dehan nia ba jornalista sira iha salaun eskola Santa Madalena de Canossa, Has-Laran, hafoin partisipa konferénsia internasionál ne’ebé mak organiza husi Forum Organizasaun Naun Governamentál Timor-Leste (FONGTIL) ho tema “Mudansa Klimátika, Injustisa ba Ekolójia no Direitu Umanu”, ohin.
Nia dehan liuhusi atividade ne’e fanun ema hotu iha konsiénsia hodi proteje ai-horis sira, tanba ne’e fó impaktu ba mundu la’ós de’i iha Timor. Ho ai-horis ne’ebé mak matak no furak bele fó bee moris ba ema no balada sira hotu ne’ebé mak moris iha mundu ne’e.
“Ha’u mai hodi apoiu hanoin sira hanesan ne’e, tanba ne’e mós hola parte importante ba konstrusaun Estadu”, governante ne’e afirma.
Nia apelu, maske daudaun ne’e ita iha lei no fatin protejida sira iha tasi no foho, maibé buat sira-ne’e hotu la to’o bainhira ita laiha konsiénsia hodi proteje ita-nia ai-laran hodi fó moris ba ita.
Nune’e mós Diretór Ezekutivu Forum ONG Timor-Leste, Valentim da Costa Pinto, hatete konferénsia ida-ne’e ho intensaun atu fó hanoin ba ema hotu oinsá impaktu husi mudansa klimátika no maneira oinsá atu asegura.
“Tanba ita jere ho di’ak ambiente sira, sei la fó impaktu klimátiku ne’ebé bele estraga buat hotu, tanba sobrevivente sira iha direitu atu hetan hahán, malirin no mahon”, Diretór katak.
Nia dehan ho nune’e mak motiva tebes sira hodi konvida matenek na’in balun husi Papua Nova Guinea, tanba ita hotu hatene katak ema Papua sira-ne’e iha ambiente ai-laran tuan barak no matak.
“Enkuantu atividade ne’e sei hala’o durante loron tolu no sei partisipa husi estudante, ativista no movimentu juventude sira seluk, inklui mós parseiru sosiedade sivíl”, nia informa.
Notísia relevante: Xefe Estadu-Embaixadora Kristin diskute asuntu mudansa klimátika
Jornalista : Alexandra da Costa
Editora : Rita Almeida
