VIKEKE, 25 Jullu 2025 (TATOLI)—Koordenadór Bee Timor-Leste, Empreza Públika (BTL, E.P.), Marito da Costa hateten progresu fíziku projetu bee-moos ne’ebé implementa iha Postu Administrativu Uatukarbau, Munisípiu Vikeke daudaun sei ki’ik tanba hasoru problema sosiál barak.
“Projetu melloramentu sistema bee-moos iha Postu Uatukarbau ne’ebé implementa iha 28 fulan-Agustu tinan 2024, ita lansa empreza implementadór hasoru problema sosiál mak hanesan rekursu bee-matan no fatin hatuur tanke hirak-ne’e mak sai problema ba empreza hodi aselera sira-nia servisu. Kuaze iha fulan hitu nian laran ita halo negosiasaun ho na’in ba rekursu bee-matan no na’in ba rai sira, foin hetan solusaun. Tan ne’e mak to’o agora fíziku obra ne’e foin atinje 8.15%,” Marito da Costa ba TATOLI iha ninia kna’ar fatin, Beloi, Vikeke, Sesta ne’e.
Koordenadór BTL, E.P. ne’e relata atinjimentu obra fíziku ne’ebé daudaun ne’e empreza atinje mak hanesan tanke inteik, tanke BPT no instalasaun kanu distribuisuan iha Postu Uatukarbau laran.
“Ba sistema bee-moos ne’e tanke hamutuk unidade hitu (7) mak ita cor, hahú husi bee-matan to’o postu, tanke sira-ne’e ami grante kualidade tanba hetan akompaña mós tékniku sira husi Ministériu Obra Públika (MOP) no materiál lokál hanesan kerikil no rai-henek teste husi laboratóriu. Nune’e, daudaun ne’e ami koloka supervaizór BTL na’in-rua (2) mak akompaña hela obra referida hodi haree progresu no dezafiu sira-ne’ebé empreza hasoru,” nia hato’o.
Marito dehan problema seluk ne’ebé empreza implementadór hasoru mak klíma (udan) difikulta servisu ba mobilizasaun materiál bá bee-matan.
“Ha’u sente tinan ida-ne’e seidauk finaliza karik, tanba ita haree mós klíma. Kuandu udan sedu, sei difikulta empreza hodi aselera servisu,” nia hato’o.
Entretantu, kustu projetu sistema bee-moos totál hamutuk $1.334.472,12 ne’ebé konstrui husi empreza Helfia Unip, Lda, durasaun servisu tinan ida. Projetu referidu benefísia uma-kain 985 no totál populasaun 15.910 no sei distribui ba instituisaun sira hanesan postu saúde, eskola, merkadu no igreja.
Jornalista: Vitorino Lopez da Costa
Editór: Xisto Freitas da Piedade
