MANATUTU, 02 Agostu 2025 (TATOLI)—Prezidente Autoridade Munisípiu Manatutu, Luís Fernandes, informa munisipiu Manatuto preparadu simu polítika desentralizasaun administrativa no podér lokál ne’ebé Governu liuhusi Minstériu Administrasaun Estatál (MAE) sei entrega kompeténsia ba kada munisípiu iha tinan 2026.
“Agora, kona-ba kondisaun infraestrutura, ami hahú halo ona husi munisipál, asembleia munisipál hodi konstrui ba tinan oin. Nune’e, tinan oin, ita bele hakat husi munisipál ba Governasaun podér lokál. Konserteza, ami sei prontu hodi simu podér lokál tanba estrutura munisipál mós iha ona,” Prezidente Autoridade Munisipiu Manatutu, Luís Fernandes, hateten ba jornalista sira iha Natarbora-Manatutu, Umaboku, ohin.
Nia hateten, kuaze progresu mós barak ona tanba buat barak mak Manatutu-oan sira halo ona, tanba Manatutu sempre prontu iha kualker saida de’it hodi hakat ba oin ztu simu politika desentralizasaun administrativa no podér lokál.
“Aleinde ne’e, ami mós iha rekursu potensiál barak tebes liuliu iha setór agrikultura nian, tanba komunidade mak iha inisiativa hodi kultiva hare, produtu lokál sira inklui mós plantasaun ai-fuan hanesan buah naga, rambutan tanba komunidade mak lori sira-nia produtu husi ne’e ba faan iha merkadu sira-ne’ebé eziste iha Dili laran,” nia dehan.
Nia indika, liuliu iha komunidade iha Bariki, tanba sira iha rekursu plantasaun barak no daudaun ne’e sira hahú kuda ona ai-fuan buah naga, no bainhira sira lori produtu sira-ne’e ba merkadu kapitál ho kuantidade ne’ebé mak barak la’ós uitoan fali, entaun ne’e hatudu katak Manatutu mós iha ninia rekursu potensiál rasik.
“Maske infranstrutura balun mak seidauk di’ak, maibé ami sei esforsu atu tau preokupasaun sira-ne’e ba iha planu munisipál nian hodi kontinua propoin ba Governu,” nia dehan.
Jornalista : Alexandra da Costa
Editór : Cancio Ximenes
