DILI, 08 Agostu 2025 (TATOLI)–Asosiasaun Akadémika Estudantíl (AAE) husi Universidade Nasionál Timor Lorosa’e (UNTL) hato’o rekomendasaun lima, relasiona ho ekipa seguransa iha loron hirak liubá halo buska no apreensaun ba Reitór universidade hamutuk ho nia estrutura.
“Iha loron 06 Agostu 2025 Polísia Nasionál Timor-Leste (PNTL) liuhusi Diresaun Servisu Investigasaun Kriminál (PSIK) ezekuta mandadu Tribunál Primeira Instánsia Judisiál Dili ho NUC 0186/25 PSIK, hodi halo buska no apreensaun ba Gabinete Reitór no estrutura universidade balun tanba deskonfia halo prátika krime falsifikasaun dokumentu no anotasaun téknika,” Portavós AAE-UNTL, Rio Davio, hato’o ba jornalista sira, iha Kampus sentrál UNTL, Sesta ne’e.
Notísia relevante : PNTL halo buska no apreensaun ba Reitór UNTL inklui kargu xefia na’in-lima
Rekomendasaun lima ba estrutura universidade no xefia sira iha UNTL mak hanesan :
- Husu ba iha orgaun másimu Konsellu Jerál UNTL atu urjentemente hola mós medida ruma tuir regra universidade nian, ba autór hirak ne’ebé notifikadu suspeita ba prosesu refere, se lae mak autór hirak ne’e nafatin prátika irregulariedade no hatun imajen UNTL nian iha públiku.
- Husu ba estrutura ne’ebe daudaun suspeita hela ba prosesu judisiál atu rejigna-an husi kargu ne’ebé atualmente ita-boot sira asume hela tanba aktu ne’ebé ita-boot sira prátika la hatudu lisaun ida di’ak ba sivista akadémiku UNTL no la tuir lema.
- Husu ba Pro-Reitór Asuntu Auditóriu Garantia Kualidade Interna atu kontinua halo serbisu, liuliu halo mós audit ba osan kaixa UNTL ne’ebé estudante sira kontribui no halo mós audit ba kantina ne’ebé konstrui iha kampus sentrál to’o agora seidauk funsiona.
- Husu ba orgaun Konsellu Disiplinar UNTL atu halo mós investigasaun ba pesoál hirak ne’ebé prátika kazu iha universidade no aplika regra interna universidade nian no husu mós atu aselera kazu Fakuldade Medisina Siénsia Saúde (FMCS) ne’ebé to’o agora ladauk iha desizaun finál ba profesór ne’ebé prátika asediu seksuál no abuzu podér.
- Husu ba sivista akademika UNTL hamutuk ho Asosiasaun Akadémika atu kontinua nafatin hato’o ezijénsia no labele tolera estrutura ne’ebé prátika irregularidade iha universidade.
AAE konsidera aktu sira ne’ebé akontese iha universidade hanesan má-jestaun, falsifikasaun dokumentu, abuzu poder, no asédiu seksuál sai ona tradisaun.
Aleinde ne’e, Asosiasaun dehan estrutura másimu universidade no kargu xefia sira viola lema UNTL ne’ebé opta SAPIENTA ET VERITAS, MATENEK NO LIA LOOS ba realidade.
“Estrutura Universidade no manorin sira tenta proteje malu husi sala, ne’ebé sira prátika tanba realidade hatudu kazu ne’ebé prátika husi manorin no kargu xefia balun iha Fakuldade Medisina Siénsia Saúde hanesan abuzu podér no asédiu seksuál to’o agora seidauk iha desizaun finál ba kazu refere, nune’e mós iha Fakuldade Filozofia iha kazu balun ne’ebé kometé husi eis Dekanu to’o agora seidauk iha desizaun. Ida-ne’e hatudu momos katak órgaun universidade la iha seriedade ba resolve kazu iha UNTL no tenta sai protetór ba-malu,” nia dehan.
Rio Davio reforsa, haree ba buska no apreensaun ne’e, Asosiasaun konsidera UNTL la’ós ona fatin ba prodús matenek no lia loos tuir lema UNTL, maibé sai fali fatin ba krime no sai fatin ne’ebé jestór sira aproveita hodi atinje interrese pesoál no grupu balun nia interrese.
“Asosiasaun Akadémika Estudantíl haree katak la’ós de’it kazu rua ne’e mak akontese maibé iha mós kazu sira seluk hanesan má-jestaun ba osan kaixa UNTL ne’ebé kada tinan estudante admitidu kontribui $20 inklui gasta osan la tuir nesesidade ne’ebé rezulta kantina universidade to’o agora la funsiona, maski universidade fakar osan hodi konstrui kantina referida, iha mós kazu sira seluk hanesan abuzu poder no kazu asédiu seksuál ne’ebé akontese iha Fakuldade Medisina Siénsia Saúde,” nia tenik.
To’o notísia ne’e publika, Ajénsia TATOLI seidauk konsege hetan deklarasaun ruma husi estrutura universidade.
Jornalista : Osória Marques
Editora : Julia Chatarina
