DILI, 22 Agostu 2025 (TATOLI)—Diresaun Nasional Transporte Terrestre (DNTT) liuhusi Departamentu Titulu Kondusaun rejistu totál rekerente ne’ebé halo tratamentu ba karta kondusaun foun ba transporte karreta no motorizada hahú husi Janeiru to’o Jullu ne’e hamutuk 8,762.
Xefe Departamentu Titulu Kondusaun, Martinho Soares, hateten kuaze tratamentu ba karta kondusaun ne’e loro-loron iha hela de’it, tanba sira loke iha segunda to’o sesta no karta kondusaun ne’ebé rekerente sira mai halo ne’e la’ós de’it ba motorizada maibé inklui mós ba kaereta.
“Husi rekerente sira-ne’e iha balun mak pasa iha ezame no balun fali mak la pasa iha ezame. Barak liu ne’ebé la pasa ne’e iha ezame foun no ezame kategória bainhira hakarak hetan karta kondusaun ba motor ho kategória métiku no ba karreta ho kategória manuál,” Xefe Departamentu ne’e informa ba Agência Tatoli liuhusi telefónika, ohin.
Tanba, nia dehan, bainhira atu hetan karta kondusaun tenke liuhusi kategória teste sira hanesan eskrita, orál, prátika tama sai roda, ezame sinál tránzitu no ezame prontu viajen iha Diresaun Nasionál Transporte Terrestre (DNTT) Balide.
“Molok atu tuir ezame mós tenke submete uluk dokumentu sira tuir ninia prosesu hanesan rekerente sira presiza foti karta akompañamentu iha Akanunu Hera, hafoin ba halo teste saúde hodi hetan atestadu médiku, hodi submete hamutuk ho dokumentu sira seluk hanesan kartaun eleitorál no foto koloridu tahan rua, hafoin submete ba loket atendementu titulu kondusaun,” nia esplika.
Nia hatutan, liuhusi ne’e foin ekipa DNTT hatama dadus ba sistema hodi distribui formuláriu ba rekerente halo pagamentu, nune’e bele kontinua tuir teste sira.
Tuir dadus. karta kondusaun provizóriu tinan rua hamutuk ema na’in-2,594, karta kondusaun permanente ba tinan lima hamutuk ema nain 8,759, no totál taxa hamutuk $335,393.00.
Jornalista : Alexandra da Costa
Editór : Cancio Ximenes
