DILI, 25 Agostu 2025 (TATOLI) – Bankada CNRT iha Parlamentu Nasionál (PN) sei halo diskusaun interna hodi kompleta estrutura meza, tanba daudaun pasta ba Primeira Vise-Prezidente Parlamentu mamuk hela.
Vise Bankada CNRT, Patrocínio dos Reis Fernandes, adianta katak sei iha desizaun interna, hodi aprezenta kandidatura, nune’e meza bele tau ba ajenda ba eleisaun iha plenária hodi hili Primeiru Vise-Prezidente foun depoizde resesu.
Tanba Maria Terezinha da Silva Viegas rezigna-an ona husi kargu efetivu dezde loron 16 Agostu hodi ba asume fali Embaixadora Estraordinária no Plenipotensiária foun Timor-Leste nian ba Japaun, hodi troka Embaixadór sesante, Ilídio da Costa.
“Ami seidauk iha preferénsia [hili fali entre deputadu sira husi CNRT] tanba iha períodu resesu”, nia hateten iha Parlamentu, ohin.
Relembra katak, iha 18 Agostu 2025, Prezidente Repúblika (PR), José Ramos-Horta, fó ona pose ba Maria Terezinha da Silva Viegas hodi asume fali kargu hanesan embaixadora.
Parlamentu Nasionál sei tama fali iha loron 15 Setembru ba funsionamentu normal hodi hili fali ema foun.
Notísia relevante: Xefe Estadu fó pose Maria Terezinha nu’udar Embaixadora Estraordinária ba Japaun
Jornalista: Nelson de Sousa
Editora: Maria Auxiliadora
