Xefe Estadu fó pose Maria Terezinha nu’udar Embaixadora Estraordinária ba Japaun

DILI, 18 Agostu 2025 (TATOLI)–Prezidente Repúblika (PR), José Ramos-Horta, Segunda ne’e, fó ba pose ba Maria Terezinha da Silva Viegas, nu’udar Embaixadora Estraordinária no Plenipotensiária foun Timor-Leste nian ba Japaun, hodi troka Embaixadór sesante, Ilídio da Costa.

Serimónia ne’e marka pasu signifikativu ida hodi hametin parseria estratéjika entre Timor-Leste no Japaun.

Prezidente Ramos-Horta iha biban ne’e, husu ba Embaixadora Viegas, durante mandatu atu hametin liután amizade entre rai rua.

“Ita-nia nasaun sira iha ligasaun forte ida ne’ebé harii liuhusi Japaun nia apoiu metin ba ita-nia dezenvolvimentu infraestrutura krítiku ba kapitál umanu. Enkuantu ita eleva ita-nia parseria komprensivu, ita hein atu avansa prioridade komun sira, inklui kresimentu sustentável, investimentu husi setór privadu, no estabilidade rejionál,” Xefe Estadu hateten iha Palásiu Prezidensiál, Bairru-Pité.

Nia haktuir, dezde estabelese relasaun diplomátika iha tinan 2002, Timor-Leste no Japaun harii ona parseria forte, hanesan respeitu ba malu no valór komun sira nu’udar nasaun marrítima ho istória reziliénsia.

PR rekoñese, Japaun sai hanesan apoiante prinsipál ba Timor-Leste nia dezenvolvimentu, hodi fornese asisténsia iha infraestrutura, kuidadu saúde, edukasaun, no redusaun risku dezastre liuhusi JICA, projetu boot sira inklui atualizasaun ba Aeroportu Internasionál Prezidente Nicolau Lobato, Estrada Nasionál no ponte Komoro.

Notísia relevante : Embaixadór Ilídio apresia autoridade Hiroshima simu timor-oan na’in-tolu kontinua estudu

Nune’e, hamutuk ho inisiativa sira iha agrikultura, peska, enerjia renovável, no kooperasaun defeza. Kolaborasaun resente inklui espansaun Ospitál Nasionál Guido Valadares, investimentu Tsuneishi Shipbuilding nian iha setór marítimu Timor-Leste, INPEX nia envolvimentu iha dezenvolvimentu enerjétiku, no Japaun mós apoia Timor-Leste nia adezaun ba ASEAN.

Xefe Estadu katak, Japaun nafatin nu’udar parseiru vitál iha Timor-Leste ba esforsu dezenvolvimentu sustentável no integrasaun rejionál.

Prezidente Ramos-Horta espresa konfiansa katak nomeasaun Embaixadora Maria Terezinha da Silva Viegas sei eleva no fortalese ligasaun amizade no kooperasaun entre Timor-Leste no Japaun.

Iha fatin hanesan, Vise-Ministra Negósiu Estranjeiru Asuntu ASEAN, Milena Rangel, hateten, Embaixadora Maria Terezinha Viegas, sei ezerse nia kargu hanesan Embaixadora foun ba Japaun durante tinan-tolu, ne’ebé sei reprezenta Timor-Leste atu halo kontinuasaun ba kooperasaun sira ne’ebé eziste ona entre rai rua.

Nia dehan, ohin Embaixadora Maria Terezinha simu ona pose, prosesu atu hala’o misaun maizumenus daudaun la’o hela, pelumenus fulan-Setembru mak sei hala’o ona nia knaar iha Japaun.

Embaixadora Timor-Leste ba Japaun, Maria Terezinha Viegas, hateten, nu’udar Embaixadora foun nia parte seidauk bele halo foun maibé daudaun nia sei kontinua buat ne’ebé Embaixadór anteriór Ilídio Ximenes halo ona. Maneira ne’ebé iha ne’ebá ne’e iha mós rekomendasaun lubuk ida ne’ebé Embaixadór anteriór husik hela, hakarak ka lakohi ida ne’e tenke kontinua.

“Prezidente Repúblika nia mensajen ne’e la presiza verbal ka pur eskrita maibé hakarak ka lakohi nu’udar reprezenta Prezidente Repúblika misaun reprezenta Estadu iha Governu Japaun, nomós kontinuasaun ba kooperasaun ne’ebé hala’o tiha ona, nomós sei kontinua,” nia dehan.

Embaixadora Maria Terezinha antes ne’e servisu ona iha Parlamentu Nasionál Timor-Leste nian iha lejizlatura oioin, inklui nu’udar Vise-Prezidente ba Parlamentu Nasionál (2023–2028), Sekretária Estadu ba Asuntu Parlamentár (2012–2017), membru hosi komisaun xave sira parlamentár nian, no partisipasaun ativu iha fórum internasionál sira hanesan AP-CPLP, iha ne’ebé nia lidera ona enkontru sira iha Portugal, Mosambike no Kabuverde.

Aleinde ne’e, defensora komprometida ida ba diplomasia no dezenvolvimentu, nia envolve mós iha inisiativa sira direitu umanu nian no kooperasaun parlamentár, hodi reforsa ligasaun globál Timor-Leste nian.

Submete karta rezignasaun iha Meza PN

Molok asume knaar hanesan Embaixadora, Maria Terezinha Viegas, submete ona karta rezignasaun nu’udar atuál Vise-Prezidente Parlamentu Nasionál (PN) ba Meza.

“Ba kargu ne’ebé ha’u asume, antes tomada de pose, ha’u halo rezignasaun. Ha’u-nia rezignasaun ne’e hahú efetivu dezde loron 16 Agostu. Enfelizmente, hakarak ka lakohi Prezidente Parlamentu Nasionál ka Vise ida mak asume filafali urjénsia ha’u nian,” nia hato’o.

Embaixadora tenik, ba Vise Parlamentu Nasionál foun, PN mak tenke eleje foun fali, iha selesaun plenária nia laran, tanba lá’os indijitasaun ka nomeasaun liuhusi eleisaun.

“Como Parlamentu Nasionál agora iha resesu nia-laran, Parlamentu Nasionál sei aguarda hela ba konvokatóriu sesaun plenária ekstraordinária ka mezmu ordinária. Maibé se ordinária, depoiz resesu, hanesan ita hotu hatene katak, Parlamentu Nasionál iha resesu hahú husi 15 Jullu to’o 15 Setembru,” nia esplika.

Loron 15 Setembru ba oin, PN iha funsionamentu normál, iha ne’e mak foin halo konvokatóriu ba eleisaun Vise-Prezidente Parlamentu Nasionál

Jornalista     : Arminda Fonseca 

Editora          : Julia Chatarina