Embaixadór Ilídio apresia autoridade Hiroshima simu timor-oan na’in-tolu kontinua estudu
DILI, 11 agostu 2023 (TATOLI)—Embaixadór Timor-Leste ba Japaun, Ilídio Ximenes da Costa, hamutuk ho Primeiru Sekretáriu Estadu Embaixada Timor-Leste ba Japaun, Júlio Martins, segunda (08/08) ne’e, hasoru malu ho Vise-Governadór Prefeitura Hiroshima, Yuko Tamai, hodi ko’alia kona-ba apoiu ba timor-oan iha área edukasaun.
“Objetivu hosi hasoru malu ne’e, ita hakarak hato’o agradese no apresiasaun ba Governu lokál Prefeitura Hiroshima, ne’ebé simu ona ita-nia timor-oan na’in-tolu iha tinan ne’e hodi estuda hasai mestradu,” Embaixadór hateten ba Agência Tatoli, via telefónika, sesta ne’e.
Notísia relevante : MNEK-Japaun Asina Akordu Bolsa Estudu JDS
Bolseiru na’in-tolu mak hanesan Albino Nicolau Freitas, Laurêncio Suni no Atanácio Barreto Caiero, ne’ebé hala’o estudu iha Universidade liuhosi programa Japonese Grant Aid for Human Resource Development Scholarship (JDS).
Durante hasoru malu, Embaixadór hato’o proposta no hanoin balun ligadu ho difikuldade ne’ebé joven no povu Timor-Leste hetan hanesan programa Technical Intern Trainees (TIT), fasilidade, materiál eskola, fasilidade pasaporte, saúde no seluk tan.
“Maibe buat sira hotu sei hato’o, ha’u sei koordena ho ministériu relevante sira hodi prienxe rekezitu ne’ebé sira husu,” nia akresenta.
Iha momentu hanesan, Embaixadór Ilídio ho Primeiru Sekretáriu Estadu Embaixada Timor-Leste ba Japaun, Júlio Martins, hasoru malu mós ho Prezidente Kámara Munispál Hiroshima, Matsui Kazumi, hodi halo diskusaun iha setór oin-oin hanesan edukasaun, formasaun, saúde, agrikultura no seluk tan, ne’ebé presiza reforsa kooperasaun bilaterál.
“Autoridade hosi Governu lokál ne’e prontu ona no iha kompromisu hodi apoiu ita liuhosi kooperasaun bilaterál no agora ne’e hein inisiativa hosi Timor-Leste atu hahú halo kooperasaun,” Ilídio tenik.
Jornalista : Arminda Fonseca
Editora : Julia Chatarina
