DILI, 04 Setembru 2025 (TATOLI)– Profesór Mitsuru Yamada no Profesór Sachiko Hirakawa husi Universidade Waseda husi Japaun, kinta ne’e, lidera estudante na’in-11 hasoru malu ho Primeiru-Ministru, Kay Rala Xanana Gusmão iha Salaun Gabinete Fronteira Terrestre no Marítima nian iha Palasiu Governu, Dili.
“Sira-nia prezensa demonstra relasaun besik entre povu Timor-Leste ho Japaun, liuliu entre jerasaun foun sira. Ohin, ha’u hasoru profesór Yamada, belun di’ak Timor-Leste nian. Nia lori joven sira husi Japaun para sira bele halo interasaun ho ita-nia juventude sira. Ida-ne’e la’ós atu promove, maibé atu introdús nasaun sira seluk, nasaun belun sira, atu nune’e iha futuru, relasaun entre ita-boot, Timor-Leste no Japaun bele metin nafatin. Diálogu, solidariedade no kooperasaun entre povu,” PM Xanana hateten ba jornalista sira.
Nia subliña, vizita ne’e la’ós ajenda ofisiál Governu nian maibé inisiativa sosiedade sivíl nian, espesífikamente husi Universidade Waseda iha Japaun.
Entretantu, Profesora Sachiko Hirakawa hato’o agradesementu kle’an tanba bele ko’alia diretamente ho Primeiru-Ministru Xanana, ne’ebé nia bolu nu’udar líder respeitadu no eroi nasionál Timor-Leste nian.
“Ohin, ha’u sente onradu tebes hodi ko’alia ho Primeiru-Ministru. Nia fó mensajen ida-ne’ebé maka estraordináriu no sinseru duni ba joven sira Japaun nian. Ida-ne’e impresionante duni, no ha’u sente responsabilidade ida hodi hato’o ba jerasaun foun sira iha Japaun,” Hirakawa hateten.
Nia hatutan, relasaun entre Japaun no Timor-Leste tenke hametin nafatin, maske ho ámbitu ne’ebé luan liu.
“Ha’u hein ho laran tomak katak relasaun entre Japaun ho Timor-Leste sei sai besik liután no aumenta, hakat liu relasaun bilaterál de’it, hodi abranje Ázia no mundu. Ne’e maka lisaun ne’ebé ha’u aprende hosi Primeiru-Ministru,” nia dehan.
Vizita ohin husi delegasaun Universidade Waseda nian afirma relasaun kle’ur entre Primeiru-Ministru Xanana ho instituisaun edukativa prinsipál Japaun nian ida-ne’e, partikularmente Profesór Mitsuru Yamada.
Antes ne’e, iha loron 11 fulan-Marsu tinan 2024, Yamada hasoru malu ho Primeiru-Ministru Xanana hodi ko’alia kona-ba planu atu estabelese Sentru Estudu Japonés iha Timor-Leste.
Objetivu husi inisiativa ne’e atu habelar orizonte husi jerasaun foun Timor-Leste nian kona-ba Japaun, enkuantu apoia dezenvolvimentu nasionál liuhusi edukasaun no interkámbiu kulturál. Planu ne’e hetan resposta pozitivu husi Primeiru-Ministru Xanana, ne’ebé husu atu realiza kedas.
Yamada nia relasaun besik ho Xanana reflete mós iha sira-nia enkontru iha Dezembru 2023, bainhira Primeiru-Ministru Xanana vizita Japaun hodi tuir Simeira ASEAN-Japaun ba da-50.
Iha biban ne’ebá, nia hasoru malu fali ho Yamada, hamutuk ho eis Embaixadór Japaun nian iha Timor-Leste, Iwao Kitahara, hodi ko’alia kona-ba kontribuisaun sira ba Timor-Leste nia dezenvolvimentu.
Entertantu, Universidade Waseda rekoñese kleur ona Xanana nia kna’ar importante iha luta Timor-Leste. Iha loron 6 fulan-Outubru tinan 2016, universidade fó grau Doutór Honoráriu iha Direitu ba Xanana Gusmão tanba ninia lideransa iha luta ba independénsia no harii hikas nasaun. Durante serimónia ne’e, Xanana Gusmão hato’o mós palestra espesiál ida ba komunidade akadémika Waseda.
Jornalista : Felicidade Ximenes
Editór : Cancio Ximenes
