DILI, 16 Setembru 2025 (TATOLI) – Xefe Estadu Maiór Jenerál Forsa Armada (XEMGFA), Tenente Jenerál Domingos Raul Falur Rate Laek, husu ba Estudante Universitariu Timor-Leste (EUTL) halo manifestasaun labele sunu uma no harahun propriedade Estadu.
“Manifestasaun ne’e normál husu de’it atu ita-nia alin sira, oan sira ho maun sira-ne’ebé halo manifestasaun aprende sira-nia manifestasaun ne’e tuir regra pasífiku, labele halo violénsia, labele halo distúrbiu, labele sunu fali uma,” Falur informa ba jornalista sira iha Kuartél Jenerál Fatuhada, Dili, tersa ne’e.
Nia dehan, buat ida uma ne’e harii ne’e tinan rua nulu-resin haat, agora ba sunu fali ida ne’e, ó-nia morál iha ne’ebé.
Falur hateten, manifestasaun ne’e iha ema terseira pesoál mós envolve hotu iha laran hakarak instabiliza situasaun.
“Ha’u hatene ke sira-ne’ebé ke organiza ne’e la halo ida-ne’e, juventude ne’ebé hamriik ne’e lá’os ida-ne’e. Ema terseiru ne’ebé deskontentamentu ulun fatuk moruk nia laran, ne’e mak halo ida ne’e,” nia afirma.
Tanba ne’e, Falur husu ba manifestante sira atu terseira pesoál labele aproveita situsaun no manifestante sira-ne’ebé halo manifestasaun tenke halo seguransa no halo vijilánsia.
Karreta Estadu hetan sunu no membru Polísia ida kanek
Manifestasaun ne’ebé orgaiza husi Estudante Universitáriu Timor-Leste (EUTL) tama ona iha loron daruak rezulta karreta estadu ida hetan sunu, membru Polísia hetan kanek no estudante balun hetan kanek, iha resintu Universidade Nasionál Timor-Leste (UNTL).
Tuir observasaun TATOLI iha terrenu nota katak, Estudante Universitariu Timor-Leste (EUTL) tersa ne’e kontinua halo asaun manifestasaun hahú husi tuku 8:00 la’o ho di’ak, hodi kontinua husu justifikasaun klaru kona-ba karreta Prado ba Deputadu ba na’in-65, maibé ezijénsia ne’e Bankada CNRT, PD no KHUNTO deklara katak, karreta ne’e kanseladu.
Maske kansela ona, maibé estudante sira kontinua halo demonstrasaun ho ezijénsia seluk pensaun vitalísia, katak Parlamentu Nasionál tenke hola pozisaun sériu ba pensaun vitalísia inklui regalias oinoin ba deputadu no kargu tituár sira.
Estudante sira konsentra iha UNTL nia oin ka frente a frente ho Parlamentu Nasionál, parte Liseu nian, Banku Mandiri no Palásiu Governu nia oin.
To’o oras 11:50 dadeer ne’e, manifestante sira halo asaun tuda kontra polísia sira iha resintu UNTL entre Parlamentu nia oin tanba polísia tiru gás lakrimojéniu hasoru estudante sira.
Nune’e liuhusi asaun ne’e estudante sira halo asaun tuda hodi estraga vidru Universidade Nasionál Timor-Leste no estraga sasán polisiál nian ne’ebé tau iha Liseu nian hodi regula manifestante labele sai husi área manifestasaun.
Manifestante sira sunu roda ida Muzeu Rezisténsia nian oin no polísia kontinua halo asaun hodi tiru gás lakrimojéniu hodi hafahe manifestante sira. Asaun ne’e ekipa Bombeiros halo kedas intervensaun hodi hamate kedas ahi.
Iha oras 13:30 lokraik ne’e manifestante sira konsege sunu karreta estadu ida iha PCIC nian oin, iha asaun ne’e polísia ida hetan pankada maka’as tanba hetan tuda husi manifestante sai inklui manifestante ida mós hetan kanek grave iha parte ain tanba polísia tiru tuir gás lakrimojéniu mak kona.
Segundu Komandante Jerál PNTL, Komisáriu Pedro Belo husu ba manifestante sira halo asaun manifestasaun ho pasífiku hodi labele estraga propriedade Estadu nian.
“Loloos alin sira kalma, ita hotu kalma hodi hein. Tanba horisehik ita-boot sira haree liuhusi asaun hanesan horikalan akompaña televizaun katak karreta la hola,” Pedro Belo inform aba estudante sira iha resintu UNTL tersa ne’e.
Nia husu estudante sira mantein kalma, labele halo asaun anarkismu hodi estraga sasán estadu nian, tanba nasaun ne’e ema barak mak fó-an ba mate hodi nakfilak sai nasaun.
“Ha’u husu imi atu konkorda malu di’ak liután atu buat hotu lao di’ak no hakmatek. Polísia la’ós lakohi fó seguransa ba ita-boot sira, maibé buat hotu tenke kordena nune’e ita bele kontrola malu ho di’ak, sé lae se mak atu kontrola sé,” nia fó hanoin.
Portavóz Manifestante Natalicio Martins hateten, ohin sira kontinua halo asaun pasífiku to’o fulan ida nia laran.
“Ohin ne’e ami kontinua halo manifestasaun hodi ezije katak hapara hola karreta ba deputadu sira maski horisehik sira deklara ona katak kansela, maibé ida-ne’e seidauk serteza no ida-ne’e mak ohin ami kontinua halo asaun ne’e,” nia afirma.
Notísia relevante: Parlamentu aprova ho unanimidade rezolusaun ba kanselamentu sosa viatura foun
Jornalista: Natalino Costa
Editór: Evaristo Soares Martins
