DILI, 04 Setembru 2025 (TATOLI)-Komisaun B Parlamentu Nasionál ba asuntu Negósiu Estranjeiru, Defeza no Seguransa, halo ona vizita traballu bá Austrália, hanesan parte ida halo esforsu diplomátiku hodi fortalese relasaun entre país rua.
Durante vizita, deputadu komisaun hala’o enkontru ho Ministra Negósiu Estranjeiru Austrália, Senadora Honoravel Penny Wong, no realiza atividade sira seluk.
Deputadu Komisaun B, David Dias Ximenes ‘Mandati’, dehan vizita ne’e hetan konvite husi Embaxada Austrália iha Timor-Leste.
Durante sorumutu ho Ministra Penny Wong, manifesta kompromisu forte atu apoia nafatin Timor-Leste iha prosesu dezenvolvimentu iha área oioin.
Parte rua mós ko’alia kona-ba kooperasaun iha área seguransa no defeza, liuliu atu apoiu Timor-Leste kombate peska ilegál.
Iha pajina Ministra Penny Wong, nia hato’o sentidu respeitu ne’ebé kle’an, amizade no solidariedade entre povu Timor-Leste no Austrália.
Simu Komisaun Parlamentár Timor-Leste nian ne’ebé trata asuntu Negósiu Estranjeiru, Defeza no Seguransa iha Canberra hodi diskute serbisu hamutuk atu forma rejiaun ida-ne’ebé pasífika, estavel no próspera.
Nu’udar parseiru dezenvolvimentu boot liu Timor-Leste nian, sei kontinua apoia soberania no dezenvolvimentu ekonómiku Timor nian. “Austrália hakarak Timor-Leste atu kontinua moris no atinje ninia potensialidade tomak”, nia hato’o.
Jornalista: Nelson de Sousa
Editora: Maria Auxiliadora
