DILI, 10 Setembru 2025 (TATOLI)—Ekipa konjunta kompostu husi Diresaun Investigsaun Kriminál, Polísia Marrítima, Komponente Navál, no Autoridade Aduaneira (AA)/Alfándega, Kuarta ne’e, hahú halo ona inspesaun ba ró Tong Yang Fui Rui.
Ró ne’e mai husi Vietname no to’o Portu Tibar iha Sesta (05/09) atu halo deskarregamentu ba sasán, maibé Autoridade la autoriza tanba la prienze kritéria.
Kapitaun Portu Dili, Kapitaun Tenente Raul Correia haktuir, durante inspesaun ekipa konjunta la identifika katak ró ne’e lori sasán kontra bandu, maibé ekipa identifika de’it ró ne’e mai sein bill of lading.
“Rezultadu inspesaun ne’ebé maka ekipa halo iha ró ne’e nia laran laiha sasán ne’ebé mak kontra bandu maibé iha maka sasán ne’ebé maka sira tula mai iha simente,” Kapitaun hato’o ba Jornalista sira hafoin hamutuk ekipa konjuta halo inspesaun ba ró iha Portu Dili.
Notísia relevante : Ekipa konjunta halo apreensaun ba ró Tong Yang Fui Rui
Durante inspesaun, ekipa konjunta mós halo pasa revista ba tripulante na’in 10 iha ró laran, hanesan kapitaun no enjiñeiru.
“Tripulante sira ne’e na’in-ualu ema Indonézia no na’in-rua ema Xina. Tripulante sira ne’e laiha problema, sira só iha problema ne’e ho sira-nia patraun tanba tripulante sira ne’e fulan-rua ona patraun la selu sira. Tanba ne’e, ohin ita-nia ajénsia ne’ebé portuáriu prontu sai mediadór hodi buka solusaun ba sira-nia problema,” Tenente Raul Correia katak.
Alfándega mak sei prosesa kondisaun ró laiha bill of lading, tanba ne’e daudaun rekolla hela informasaun hafoin sei haree prosesu ba oin ne’e karik atu aplika multa ka oinsá.
“Prosesu investigasaun sei la’o hela ho ita-nia serbisu investigsaun kriminál depois sira haree ida-ne’e, agora ba oin sasán ne’e atu hatun husi ró ne’e ka halo nusa, ida-ne’e responsablidade Alfándega nian,” Kapitaun tenik.
Tripulante sira daudaun ne’e kontinua iha ró ne’ebé iha tasi laran to’o ekipa konjunta konklui tiha prosesu investigsaun ba ró.
Jornalista : Natalino Costa
Editora : Julia Chatarina
