BOBONARU, 18 Setembru 2025 (TATOLI)-Organizasaun umanitária Krús Vermella Timor-Leste (CVTL) filiál Bobonaru ho delegasaun Krús Vermela Amérika, hamutuk ho Diresaun Servisu Munisipál Edukasaun, Autoridade Protesaun Sivíl Munisípiu Bobonaru, observa projetu “Streangtheing Disaster Reduction” hodi instala gabiaun iha Eskola Bázika Filiál (EBF) Lebos, iha suku Lebos, postu administrativu Lolotoe, munisípiu Bobonaru.
Instalasaun gabiaun ne’e ho naruk metru 23 no luan metru 2 hodi proteje estrutura edifisíu eskola husi dezastre naturál.
“Prosesu ida envolve diskusaun husi autoridade lokál, família inan-aman sira, dehan eskola ne’e rai halai, muru sira ne’e hetan mós ameasa. Tanba ne’e, ita halo gabiaun ida-ne’e hanesan parte mitigasaun ida ba rai halai”, reprezenta Sekretariu-Jerál CVTL, Agapito da Silva, hateten.
Biban ne’e, xefe suku Lebos, Jacinto Pereira, agradese ba CVTL no konsidera projetu ne’e bele salva ona eskola ne’e husi erozasaun. “Obra ne’e fó benefísiu ba ami, tanba durante ne’e edifísiu sira ita hare iha área foho-lolon sira ne’e presiza mós gabiaun, nune’e asegura edifisíu eskola”, katak.
CVTL ho Autoridade Protesaun Sivíl (APC) no Diresaun Servisu Munisipál Protesaun Sivíl Bobonaru mós observa bee-debun iha área Talgo no konservasaun bee iha Ibuk, inklui monitoriza instalasaun toa ka sistema alerta sedu ba dezastre naturál iha suku Lebos.
Molok ne’e, ekipa CVTL serbisu hamutuk ho APC disponibiliza formasaun ba estudante no komunidade kona-ba oinsa salva an bainhira akontese dezastre naturál.
Notísia relevante: Projetu PNDS 2024 rua iha Bobonaru la’o hikas, 13 paradu
Jornalista: Sergio da Cruz
Editora: Maria Auxiliadora
