DILI, 20 Setembru 2025 (TATOLI) – Prezidente Repúblika (PR), José Ramos-Horta, kongratula Komandu Forsa-Defeza Timor-Leste (F-FDTL) ne’ebé komemora loron International Force in East Timor (INTERFET) ba da-26 iha tinan ne’e.
Xefe Estadu elojia Komandu F-FDTL nia inisiativa ne’ebé komemora loron INTERFET ne’e ho jogu amigavel, ne’ebé partisipa husi F-FDTL, forsa Austrália, Estadu Unidu Amérika, Nova Zelándia no Japaun, nu’udar momentu importante atu forsa armada Timor-Leste kontinua hametin relasaun militár ho nasaun sira ne’e.
“Parabéns ba Governu, ba Komandu Xefe Estadu Maiór Jenerál Forsa Armada Timor-Leste nian ne’ebé hanesan uma-na’in, Ministériu Defeza. Parabéns ba hothotu, ba sira ne’ebé organiza ida-ne’e”, Ramos-Horta hateten iha nia intervensaun iha ámbitu enserramentu jogu futeból amigavel entre F-FDTL no forsa Austrália, iha Estádiu Munisipál Dili, sábadu ne’e.
Nia agradese mós forsa Austrália, Estadu Unidu Amérika, no Japaun ne’ebé partisipa jogu amizade ida ne’e.
Xefe Estadu ne’e akresenta katak komemorasaun loron INTERFET ne’e la’ós atu komemora de’it ho jogu amizade, maibé sai oportunidade ne’ebé importante ba nasaun sira ne’ebé uluk hola parte misaun INTERFET nian, hodi sira bele halo interkámbiu hodi reforsa kooperasaun militár ba malu.
“Hasoru malu iha ne’e, iha rai doben ida-ne’e entre militár sira hametin liután relasaun nasaun sira. Ha’u haree hothotu serbisu di’ak tebetebes”, nia afirma.
Prezidente Repúblika ne’e mós kongratula Embaixada Austrália no atleta sira ne’ebé partisipa iha jogu ne’e. “Parabéns ba embaixada no parabéns ba atleta sira ne’ebé iha klase hothotu ne’ebé partisipa iha jogu ne’e”, hato’o.
Iha fatin hanesan, Xefe Estadu Maiór Jenerál Forsa Armada (XEMGFA), Tenente-Jenerál Domingos Raul Falur Rate Laek, hateten komemorasaun loron INTERFET nu’udar selebrasaun anuál.
Nia dehan, tinan ne’e komandu F-FDTL organiza diferente ho tinan sira liu ona, tanba selebra ho jogu amizade, programa interkámbiu forsa sira entre F-FDTL no forsa armada Austrália, tanba F-FDTL sira sei bá partisipa jogu futeból iha Austrália iha fulan oin no atividade relijioza nian.
“Austrália no Portugál nu’udar parseiru estrátéjiku ba dezenvolvimentu formasaun ba ita-nia militár sira. Ita-boot sira ba halo investigasaun karik sémak halo investimentu boot liu ba forsa defeza sira ne’e mak tau osan boot liu kualkér instituisaun iha mundu”, nia haktuir.
Ministru Juventude, Desportu, Arte no Kultura (MJDAK), Nelyo Isaac Sarmento, hateten jogu amigavel ne’e nu’udar parte ida husi diplomasiadesportu hodi fortifika relasaun militár nian.
“Ita espera katak desportu ne’e laiha inimigu, liuhusi desportu ita koñese malu no ita fó valór ba fraternidade entre ita ho ita. Ida-ne’e hanesan meiu diplomasia ne’ebé ita-nia forsa sira halo para depois fortifika ita-nia relasaun”, nia dehan.
Nune’e mós Reprezentante Xefe Estadu Maiór Jenerál Forsa Armada Austrália, Brigadeiru Jenerál Malcolm Wellsx, dehan forsa Austrália kontente serbisu hamutuk ho F-FDTL, liuhusi programa kooperasaun defeza ne’ebé Austrália ho Timor-Leste estabelese no ezersísiu harii hamutuk.
Nia dehan iha komemora loron INTERFET ba da-26, liuhusi jogu amizade Xanana-Peter Cosgrove liuhusi jogu ne’e bele selebra fali misaun INTERFET halo ona ba Timor-Leste iha pasadu.
“Jogu ida-ne’e atu sebra komemorasaun forsa INTERFET nian prezensa iha Timor- Leste iha tinan 26 liubá no relembra kooperasaun Xanana no Jenerál Peter Cosgrove iha Setembru 1999. Ne’e nu’udar ezemplu ne’ebé ita kontinua no ba jerasaun foun sira hodi dezenvolve ita-nia relasaun ne’ebé iha ona “,nia hakotu.
Selebrasaun loron INTERFET ba da-26 tinan ne’e selebra ho atividade jogu futeból entre F-FDTL kontra forsa Austrália no Austrália mak sai manán-na’in, liuhusi penalidade 5-3.
Ba jogu futsál feto F-FDTL kontra forsa feto Austrália ne’ebé halo iha kampu futsál Kuartél Jenerál F-FDTL Fatuhada no ekipa feto F-FDTL mak sai vensedora iha jogu ne’e ho golu 2-0.
Jornalista: Natalino Costa
Editora: Maria Auxiliadora
