DILI, 03 Outobru (TATOLI)—Governu liuhusi Sekretária Estadu Formasaun Profisionál no Empregu (SEFOPE) sei haruka tan traballadór timoroan na’in-118 ne’ebé kompostu husi feto na’in-47 no mane na’in-71 hodi ba servisu iha Austrália.
Notísia Relevante: SEFOPE-Governu Austrália selebra atinjimentu mobliza traballadór timoroan ba Austrália hamutuk 20.814
Traballadór na’in 118 ne’e sei ba servisu iha kompañia neen (6) mak hanesan kompañia Connect Group Niceforo, FPG Group, Top of The Crop/Kyshan, ADCO The Job Shop, Harvey Beefb (Long Term), Connect Group Mangos no husi traballadór sira-ne’e foun hamutuk na’in-32 no traballadór returnu hamutuk na’in-86.
Sekretáriu Estadu Formasaun Profisionál no Empregu, Rogério Araújo Mendonça, hateten prezensa traballadór sira-nia aumenta tan númeru traballadór timoroan ba Austrália, entaun ida-ne’e apresia tebes ba Governu Austrália ne’ebé servisu hamutuk ho Governu Timor-Leste bele simu ona traballadór timoroan ba servisu iha ne’ebá.
“Ohin, imi rona informasaun barak husi lideransa sira. Hanoin, imi mós hatene ona kondisaun moris iha Austrália, maibé ba traballadór foun sira presiza adapta no tenke hatudu prestasaun servisu ne’ebé mak di’ak,” Sekretáriu Estadu hateten ba Agência Tatoli iha ótel Palm Spring, Kampung Alor, ohin.
Enkuantu, nia hatutan, ba traballadór sira-ne’ebé tuan (reentry) atu motiva fali traballadór foun sira hatudu atitude di’ak nune’e empregadór bele kontinua fó kontrata ba sira maske kontratu ramata ona.
Sekretéria Primeira Embaixada Austrália iha Timor-Leste, Penny Roberts, hateten ohin loron traballadór sira-nia prezensa iha ne’e tanba selesionadu no lafasíl ba sira, tanba sei liuhusi fazeadamente teste nian no sira-nia esforsu no kompromisu bele atinje mehi ida-ne’e.
Ba traballadór foun sira-nia esforsu bele to’o iha meta ida-ne’e, enkuantu ba traballadór returnu sira obrigadu ba sira-nia dedikasaun no fó kontribuisaun ba Austrália no Timor-Leste.
“Hodi Governu Austrália nia naran ha’u hakarak apresia uluk adiantamente kontribuisaun saida mak imi sei halo bainhira ba servisu iha Austrulia,” nia dehan.
Nia hatutan, tanba servisu mobilidade laborál ne’e sei fó benefísiu di’ak ba empregadór sira halo sira-nia negósiu hodi hadi’a moris no oportunidade ba traballadór sira hetan mós osan inklui dezenvolvimentu Timor-Leste nian bele la’o di’ak liután liuhusi remesa.
Diretór Diresaun Nasionál Empregu Estranjéiru ihw SEFOPE, João Correia, hateten husi totál traballadór sira-ne’e iha empregadór neen (6) mak halo rekrutamentu ba timoroan sira hodi ba servisu iha Austrália, tanba ne’e iha loron 06 to’o 10 Outubru sei aranka ba Autrália, tanba sira-nia billete preparadu ona.
“La kle’ur tan imi sei husik hela fatin ne’e hodi kontinua ba servisu iha rai-li’ur deseju ba imi servisu di’ak hanoin família hodi kontribui dezenvolvimentu ekonómia,” nia dehan.
Nia hatutan, tanba bainhira traballadór sira-nia kontratu rama ne’e sira fila mai família sei simu sira-nia susesu bainhira fó kontribuisain ona ba família no rai ida-ne’e.
Iha oportunidade ne’e, Reprezentante Traballadór Timoroan, Norberto Asis da Costa Belo, sente kontente no hato’o agradesementu bele hetan tan oportunidade dala rua hodi kontinua servisu iha Austrália.
“Antes ne’e ha’u ba serviu iha kompañia Tsmania Berries kuu ai-fuan durante fulan neen, agora ami ba fali sei servisu temporária iha Darwin kuu haas durante fulan rua no hafoin ba fali Tsamania, durante fulan hitu. Fiar katak ha’u fila mai sei fó kontribuisaun ba família liuliu fó oan sira ba eskola,” nia hateten.
Entretantu, traballadór sira-ne’e sei aranka husi loron 06 to’o loron 10 fulan-Outobru tinan 2025.
Jornalista : Alexandra da Costa
Editór : Cancio Ximenes
