SEFOPE-Governu Austrália selebra atinjimentu mobliza traballadór timoroan ba Austrália hamutuk 20.814
DILI, 18 Setembru 2025 (TATOLI)—Sekretária Estadu Formasaun Profisionál no Empregu (SEFOPE) hamutuk ho embaixadór Austrália ba Timor-Leste selebra atinjimentu servisu entre Governu Timor-Leste ho Governu Austrália ne’ebé konsege mobiliza ona traballadór timoroan sira liuhusi programa Pacific Australia Labour Mobility (PALM) ho totál 20.814.
Sekretáriu Estadu Formasaun Profisionál no Empregu, Rogério Araújo Mendonça, hateten husi inisíu servisu hamutuk entre Governu Timor-Leste no mós Austrália nian iha Programa Mobilidade Laborál ne’e mobiliza traballadór sira ho númeru ne’ebé mak kiik maibé ohin loron ninia kuantidade sa’e ona ho númeru boot.
“Liuliu iha situasaun COVID-19 nia laran ne’e, ita mobiliza traballadór timoroan ba Austrália ho númeru ne’ebé kiik tanba tempu ne’ebá laiha sirkulasaun viajen tama no sai ba rai-li’ur,” Sekretáriu Estadu ne’e informa ba jornalista sira iha Top Golf Kristu Rei, kuarta ne’e.
Nia dehan, maske iha tinan 2024 sira konsege mobiliza traballadór timoroan na’in-4.000 ba servisu iha Austrália, maibé ohin loron traballadór ne’ebé mak ba servisu ona iha Austrália hahú husi tinan 2012 to’o 2025 liuhusi Programa Mobilidade Laborál ho totál hamutuk 20.814.
Enkarregadu Negósiu Embaixada Austrália iha Timor-Leste, Ed Wilkinson, hateten onra ida ba nia hodi hamriik iha fatin ida-ne’e hodi selebra inkredivél ida-ne’e ba atinjimentu traballadór timoroan na’in-20.814 husi eskema PALM nian.
“Viajen servisu ida-ne’e hahú iha tinan 2012 ne’ebé koñesidu hanesan traballadór seasonál, tanba ne’e iha oportunidade ne’e ha’u hakarak fó omenajen ba traballadór timoroan dahuluk ne’ebé iha korajen hakat ba oin no aproveita oportunidade iha momentu ne’ebá,” Enkarregadu ne’e hateten.
Diplomata ne’e dehan, Governu nia aten brani no kompromisu mak sai hanesan fundasaun ba buat hotu ne’ebé selebra ohin, nune’e Governu sira-nia kompromisu mós kria efeitu tempu naruk ida-ne’ebé la’ós de’it ba programa ne’e ninia susesu maibé hametin relasaun bilaterál nian.
“Antes ne’e kontratu ne’ebé iha hahú husi fulan tolu sa’e ba fulan sia maibé agora bele to’o tinan haat, entaun ami louva ita-boot sira-nia vizaun no konsisténsia. Eskema PALM la’ós jornada ida ne’ebé fasíl maibé sai hanesan jornada ne’ebé bele,” nia informa.
Tanba, nia dehan, Governu Austrália haree ona buat barak mak atinje, entaun ohin selebrasaun ida-ne’e kona-ba traballadór timoroan sira, Governu nia papél mak importante tebes ba dezenvolvimentu ekonómiku nian no kreximentu setór privadu, no ligasaun kultura iha Austrália tantu iha Timor-Leste.
Enkuantu, iha atividade ne’e marka prezensa husi entidade Governu Austrália inklui Timor-Leste, ekipa Pacific Australia Labour Mobility, reprezentante traballadór timoroan sira no parséria dezenvolvimentu sira.
Durante atividade ne’e mós, traballadór timoroan sira-ne’ebé fila mai Timor halo negósiu iha sira-nia rai halo promosaun ba sira-nia produtu iha atividade ne’e.
Jornalista : Alexandra da Costa
Editór : Cancio Ximenes
