DILI, 10 Outobru 2025 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, hateten sira iha Diresaun Nasionál Empregu Estranjeiru ne’ebé fó biban ba timoroan sira ba servisu iha rai-li’ur hodi hamenus taxa dezempregu rai laran ho 4,8%, tanba iha tinan 2024 númeru taxa dezempregu hamutuk 5,1%.
Notísia Relevante: SEFOPE haruka tan traballadór timoroan 118 servisu iha Austrália
Sekretáriu Estadu Formasaun Profisionál no Empregu, Rogério Araújo Mendonça, afirma Governu Timor-Leste liuhusi SEFOPE sempre servisu hamutuk ho nasaun seluk atu fó espasu empregu ba timoroan sira hodi kria empregu ba sira-nia an iha rai-li’ur inklui fila mai kria fali empregu ba ema seluk iha rai-laran.
“Hanesan ne’e timoroan ida mak dezempregu maibé bainhira nia sai traballadór ba servisu iha rai-li’ur, signifika katak nia bele redús ona taxa dezempregu iha rai-laran tanba durante ne’e ita mobiliza ona timoroan barak ba Austrália hamutuk 21.000-resin. Sira-ne’e mak halo returnu ba mai, enkuantu iha fali Korea nia traballadór ne’ebé ita haruka ba hamutuk 7000-resin,” Sekretáriu Estadu informa ba jornalista sira iha City 8, Manleuana, kinta ne’e.
Aleinde ne’e, nia hatutan, númeru empregu ba timoroan ne’ebé servisu iha Japaun sa’e ona ba 52, inklui sira sei haruka tan timoroan balun ba servisu iha Nova Zelándia.
“Imi hatene sira ne’ebé ba servisu iha rai-li’ur balun fila mai mós loke empregu ba sira nia-an no envolve mós ema seluk servisu iha sira-nia negósiu, ne’e mós bele hatudu katak sira ajuda Governu redús problema dezempregu iha rai-laran,” nia dehan.
Enkuantu kampu traballu ne’ebé SEFOPE rasik kria iha tTmor maka liuhusi programa empregu temporáriu, ne’ebé fó biban liu ba komunidade iha área rurál, hodi hadi’a dalan ne’ebé kuak iha tempu udan, hamoos drainajen sira-ne’ebé selu kada loron ho montante $3.
Jornalista : Alexandra da Costa
Editór : Cancio Ximenes
