DILI, 10 Outobru 2025 (TATOLI)—Ministériu Saúde (MS) liuhusi Diretór Jerál Servisu Koorporativu, Narciso Fernandes, klarifika Ministériu laiha intensaun kansela sosa ambulánsia multifunsaun maibé deside kansela métodu aprivizionamentu tanba empreza husu kustu boot-liu.
Diretór ne’e halo klarifikasaun tanba espailla ona iha públiku liuhusi mídia sosiál katak MS halo kanselamentu sosa ambulánsia multifunsaun hodi troka fali ho Toyota Land Cruiser ba operasionál ne’e la loos.
“Ministériu Saúde halo planu 2025 atu sosa karreta ambulánsia multifunsaun nomós karreta operasionál. Maibé momentu ne’ebá ita loke konkursu públiku neé iha kompaiña ida (1), maibé nia husu kustu boot-liu mak ami deside kansela métodu aprovizionamentu, la’ós kansela sosa karreta maibé kaereta ambulánsia ne’e ita sosa nafatin,” Diretór Jerál ne’e hateten ba jornalista sira iha Palásiu da Sinza, Kaikolim sesta ne’e.
Nia hatutan, karreta ambulánsia multifunsaun ne’ebé MS sosa hamutuk hitu (7) no karreta operasionál ho marka Land Cruiser ne’e ida (1).
“Ambulánsia-ne’e nesesidade propriu ba populasaunno fasilidade saúde nian ho nune’e ami deklara katak informasaun sira-ne’ebé espalla iha públiku katak kanesela sosa ambulánsia la loos,” nia dehan.
Diretór ne’e dehan, prosesu konkursu públiku atu sosa karreta hirak ne’e la’o hela, no totál orsamentu ba sosa ambulánsia multifunsaun hitu (7) ne’e hamutuk rihun $700-resin no orasamentu ba sosa kareta operasionál ida (1) Diretór ne’e la mensiona nia montante.
Nia informa tan, maiória krareta operasionál iha MS kondisaun tuan hotu ona hamutuk 50, maibé Miniatériu nafatin utiliza hodi mellora prestasaun servisu.
Jornalista : Alexandra da Costa
Editór : Cancio Ximenes
