Prezidente Repúblika kondekora medalla méritu ba brigada médiku xineza na’in-12
DILI, 14 Outubru 2025 (TATOLI)–Prezidente Repúblika (PR), José Ramos-Horta, Tersa ne’e, kondekora medalla méritu no diploma rekoñesimentu ba brigada médiku xineza hamutuk 12, ba sira-nia kontribuisaun iha setór saúde Timor-Leste nian.
PR Ramos-Horta hateten, kondekorasaun ba médiku dedikadu ne’e simboliza agradesimentu kle’an husi povu Timor-Leste.
“Sira-nia serbisu reprezenta espíritu kooperasaun internasionál no salva ona moris ema barak, hasa’e ita-nia kapasidade médiku sira, no hametin ligasaun amizade no solidariedade entre ita-nia nasaun rua,” Ramos-Horta hateten, liuhusi nia diskursu iha Palásiu Prezidensiál, Bairru-Pité.
Grupu ba dala-10 husi Ekipa Ajuda Médika Xina nian konklui ona sira-nia termu serbisu. Brigada médika foun 12 husi grupu 11 sei to’o iha loron 15 Outubru tinan ne’e.
Notísia relevante : PR Ramos-Horta sei kondekora Anwar Ibrahim ho medalla ‘Grande Colar’
Xefe Estadu dehan, rekoñesimentu ida-ne’e hakerek iha akordu kooperasaun ida entre Repúblika Demokrátika Timor-Leste no Repúblika Populár Xina. Dezde Governu Konstitusional dahuluk, Governu Xina fó apoiu ba setór saúde Timor-Leste, ho sira-nia ekipa asisténsia médika dahuluk mai iha Dezembru 2003.
Ekipa asisténsia médika dahuluk husi Xina hahú serbisu médiku hodi suporta Ospitál Nasionál Guido Valadares iha Janeiru 2004.
Ekipa Ajuda Médiku Xina Kada tinan-rua halo ona rotasaun, hahú husi ne’ebá, iha brigada médiku xineza hamutuk 123 mak serbí iha Timor-Leste.
Grupu ba dala-10 husi Ekipa Ajuda Médika Xineza kompostu husi brigada médika 12 husi Komisaun Saúde Provinsiál Sichuan, hala’o ona sira-nia atividade klínika gratuita lubuk ida durante tinan-rua iha Ospitál Nasionál Guido Valadares no sentru saúde sira seluk iha Timor-Leste, iha área sira kardiolojia, urolojia, sirurjia jerál, obstetrízia no jinokolojia, ortopedia, anestezia, rehabilitasaun Médika Tradisionál Xina (MTX), servisu enfermajen, medisina kuidadu intensivu, no servisu radiolojia.
Durante sira-nia períodu, Ekipa Médika ba dala-10 konsege liu emerjénsia ambulatóriu 19.000, ospitalizasaun 5.800, no operasaun 1.300.
Ekipa ne’e mós hala’o programa divulgasaun barak, organiza misaun klínika gratuita boot liu 10 iha área remota hanesan Atauru, Laga, no Likisá hodi fó diagnóstiku, tratamentu, no ai-moruk ba sidadaun timoroan rihun ba rihun.
Aleinde ne’e, ekipa ne’e ativamente promove saúde públika liuhusi hala’o formasaun reanimasaun kardiorespiratória (CPR) no formasaun primeiru sokoru ba públiku, dosente iha Eskola Negósiu Timor-Leste, no pesoál korporativu.
Ekipa ne’e mós hala’o papél vitál iha komunidade médika akadémika, partisipa no apoia simpóziu sientífiku nasionál no internasionál hodi fahe koñesimentu no haburas dezenvolvimentu setór kuidadu saúde Timor-Leste nian.
Brigada Médika Xineza sanulu resin rua ne’e tuir mai ne’e husi Ekipa Ajuda Médika Xineza ba dala 10 kondekoradu ho Medalla Méritu no Diploma Rekoñesimentu, tuir Dekretu Prezidente Repúblika Númeru 101/2025.
Xineza 12 mak hanesan, Dr. Luo Wei (Radiologista), Dr. Xie Guoping (Urologista), Dr. Zhou Wenyi (Cozinheiro), Dr. Zeng Dongxu (Intérprete), Dr. Hou Chunmeng (Médico de I.C.U), Dr. Liu Lan (Ortopedista), Dr. Lei Bibo (Anestesista), Dr. Qin Han (Cirurgião), Dr. Yang Qinggao (Cardiologista), Dr. Wang Wei (Enfermeira), Dr. Zou Wenjing (Akupunturista), no Dr. Chen Liju (Ginecologista e Obstetra).
Brigada médika xineza hotu ne’ebé serbisu iha Timor-Leste mai husi Provínsia Sichuan husi Repúblika Populár Xina.
Iha fatin hanesan, Embaixadora Xina mai Timor-Leste, Wang Wenli, hato’o agradesimentu ba Estadu Timor-Leste ne’ebé ohin kondekora ona médiku Xineza hamutuk 12.
“Ami hato’o agradese tebes ba Estadu Timor-Leste ne’ebé ohin kondekora medalla méritu ba ami-nia médiku sira, ba oin ami kontinua halo esforsu apoiu iha setór saúde nian iha Timor-Leste, tanba ita hotu hatene apoiu ne’ebé ami halo iha setór saúde ne’e importante tebes,” nia katak.
Jornalista : Arminda Fonseca
Editora : Julia Chatarina
