DILI, 23 Setembru 2025 (TATOLI) – Prezidente Repúblika José Ramos-Horta hateten, aban (24/09/2025) sei atribui medalla ho grau ‘Grande Colar Orden Timor-Leste’ ba Primeiru-Ministru Malázia Dato’ Seri Anwar Ibrahim.
Ramos-Horta esplika, kondekorasaun ne’ebé atribui hanesan rekoñesimentu ida ba Dato’ Seri Anwar Ibrahim nia advokasia pesoál ba Timor-Leste nia kauza no Malázia nia papél xave iha ninia lideransa.
“Aban sei sai onra boot ida ba ha’u atu kondekora Primeiru-Ministru Dato’ Seri Anwar Ibrahim ho ‘Grande Colar da Ordem de Timor-Leste’, ami-nia nasaun nia onra aas liu. Kondekorasaun ida-ne’e nu’udar rekoñesimentu ba ninia advokasia pesoál no kle’ur ona ba ami-nia kauza, no ba Malázia nia papel xave, iha ninia lideransa nia okos, hodi apoia ami-nia dezenvolvimentu nasionál no ami-nia jornada atu sai membru ASEAN ba dala-11,” Ramos-Horta hateten bainhira ramata enkontru ho Anwar Ibrahim iha Palásiu Prezidensiál Dili, tersa ne’e.
Notísia relevante:PM Malázia ho delegasaun estadia ona iha Timor-Leste
Xefe Estadu ne’e argumenta, Timor-Leste ho Malázia sai parseiru di’ak tebes, la’ós foin agora maibé hori uluk kedan no relasaun entre nasaun rua sai metin liután.
“Timor-Leste no Malázia la’ós de’it nasaun viziñu, ita mak parseiru iha konstrusaun Sudeste Aziátiku ida ne’ebé dame, prósperu, no integradu. Ha’u fiar metin katak vizita ida-ne’e sei loke kapítulu foun ida ne’ebé importante tebes iha ita-nia relasaun,” Horta hakotu.
Notísia relevante:Governu koordena ho Xefe Estadu kona-ba PM Malázia vizita TL
Jornalista: Hortencio Sanchez
Editór: Rafael Ximenes de A. Belo
