DILI, 09 Setembru 2025 (TATOLI)–Governu liuhusi Vise-Primeiru-Ministru no Ministru Koordenadór ba Asuntu Ekonómiku no Ministru Turizmu Ambiente, Francisco Kalbuadi Lay, tersa ne’e, hasoru malu ho Prezidente Repúblika José Ramos-Horta hodi koordena kona-ba preparasaun simu vizita Primeiru-Ministru Malázia mai Timor-Leste ne’ebé sei akontese iha loron 23 fulan-Setembru 2025.
Notísia Relevante: PM Malázia husu Estadu Membru ASEAN apoia TL nia adezaun
“Ha’u mai atu koordena ho Prezidente Repúblika kona-ba atu simu vizita ida, Primeiru-Ministru Malázia, Dato’ Seri Anwar Ibrahim ne’ebé sei mai vizita Timor-Leste iha fulan ida-ne’e. Ha’u mai ne’e tanba simu orientasaun husi ita-nia Primeiru-Ministru hodi mai koordena ho ita-nia Prezidente Repúblika,” Kalbuadi hateten ba jornalista sira hafoin ramata reuniaun ho Xefe Estadu iha Palásiu Prezidensiál Nicolau Lobato, Bairru Pite, ohin.
Nia dehan, koordenasaun ne’e hahú husi Prezidente Repúblika no sei to’o iha parte hotu atu halo preparasaun ne’ebé di’ak hodi simu Dato’ Seri Anwar Ibrahim ho di’ak.
“Ita koordena hahú uluk husi Prezidente Repúblika, depois ba fali Ministériu Negósiu Estranjeiru no Kooperasaun, ho sira seguransa, orientasaun lubuk ida ha’u simu ona, hahú aban ba oin sei koordena de’it servisu sira to’o Primeiru-Ministru Malázia vizita ita-nia nasaun,” Kalbuadi dehan.
Nia relata, vizita Primeiru-Ministru Dato’ Seri Anwar Ibrahim importante tebes tanba antes Timor-Leste atu adere ba ASEAN hanesan membru plenu iha fulan-Outubru, Primeiru-Ministru ne’e fó apoiu másimu tebes.
Tuir informasaun ne’ebé iha, vizita Primeiru-Ministru Dato’ Seri Anwar Ibrahim mai Timor-Leste atu hametin liutan relasaun billaterál entre Timor-Leste no Malázia.
Notísia Relevante: KM aprova rezolusaun 14 apoia Timor-Leste nia adezaun ba mempru plena ASEAN
Jornalista : Hortencio Sanchez
Editór : Cancio Ximenes
