DILI, 23 Setembru 2025 (TATOLI) – Líder ezekutivu Malázia Anwar Ibrahim ho nia delegasaun to’o ona Aeroportu ho nia delegasaun to’o ona aeroportu Internasionál Prezidente Nicolau Lobato Dili tuku 15h00 oras lokál ho aviaun privadu Malázia nian.
Anwar Ibrahim, Primeiru-ministru Malázia hahú tinan-2022 ne’e, ho delegasaun vizita ofisiál mai Timor-Leste foin ba dahuluk.
Tuir ajenda protokolu, autoridade governativa Malázia ne’ebé moris iha loron 10 Agostu 1974 ne’e, sei estadia iha Timor-Leste durante loron rua – hahú ohin to’o aban (23-24) setembru 2025.
Vizita istóriku ida-ne’e, ba dala uluk husi Primeiru-Ministru Malázia ida iha tinan-22 nia laran, sei hametin relasaun bilaterál no apoia Timor-Leste nia prontidaun atu sai membru ho diretu plenu ba organizasaun Sudeste-Aziátiku, ASEAN, ba da-11.
Bainhira to’o, Primeiru-Ministru Anwar simu direita hosi Prezidente Repúblika José Ramos-Horta no Primeiru-Ministru Kay Rala Xanana Gusmão, Vise-Primeiru-Ministru Francisco Kalbuadi Lay no Ministru Negósiu Estranjeiru no Kooperasaun (MNEK) Bendito Freitas ne’ebé akompaña ho parade militár.
Bainhira la’o tama ba resintu Aeroportu nian iha labarik nain-haat (4) – feto rua, mane rua, ne’ebé preparadu hodi tara Tais ba Anwar Ibrahim no simu kedan ho tebe-dai tuir tradisaun Timor-Leste nian bainhira simu bainaka – nu’udar jestu timoroan sira-nia simu bainaka no ospitalidade.
Hafoin deskansa minutu balun iha sala VIP, Primeiru-Ministru Anwar akompaña husi Primeiru-Ministru Xanana Gusmão no sa’e direita ba kareta Prezidente Ramos-Horta nian ho tipu MOKE ho númeru matrikula JRH-2612 no karreta referidu konduz rasik husi Xefe Estadu.
Husi Aeroportu, Prezidente Ramos-Horta ne’ebé akompaña husi Xefe Governu Xanana Gusmão lori líder Malázia ne’e ba deskansa minutu 10 iha Otel PalmSpring Fatuhada, Dili.
Tuir sekuénsia ajenda, Primeiru-Ministru Malázia, Anwar, hahú nia benvindu ho eventu seremónia ida iha Palásiu Prezidensiál, no hala’o enkontru ho Prezidente Repúblika José Ramos-Horta.
Iha kalan, Primeiru-Ministru Anwar tuir bankete Estadu nian ne’ebé organiza hamutuk hosi Prezidente Repúblika no Primeiru-Ministru iha Edifísiu Multiuzu GMN, Dili.
Tuirmai, Primeiru-Ministru Anwar sei hato’o diskursu prinsipál iha Parlamentu Nasionál, hala’o enkontru bilaterál ho nia kompatriota, Xanana Gusmão, iha Uma Governu, asiste troka memorandu entendimentu (MoUs), no hala’o konferénsia imprensa konjunta.
Primeiru-Ministru Anwar mós tuir ajenda atu hasoru malu ho komunidade Malázia no antigu alunu sira hosi Programa Koperasaun Téknika Malázia (MTCP), hato’o série Palestra Prezidensiál iha Palásiu Prezidensiál, no vizita Sentru Konvensaun Internasionál iha Portu Dili.
Jornalista: Hortencio Sanchez
Editór: Rafael Ximenes de A. Belo
