DILI, 13 Outubru 2025 (TATAOLI)—Parlamentu Nasionál (PN) liuhusi sesaun plenária, Segunda ne’e, hato’o sentidu kondolénisa ba família husi traballadór Domingos da Costa, ne’ebé mate iha Koreia Súl tanba monu ba tasi-laran durante hala’o hela serbisu.
Deputadu Bankada Konsellu Nasionál Rezisténsia Timoroan (CNRT), Natalino dos Santos husu ba Governu, ba futuru bainhira hakarak haruka traballadór timoroan serbisu bá rai-li’ur tenke tau kritériu no teste espesífiku, nune’e traballadór sira iha koñesimentu kona-ba ambiente serbisu.
“Ha’u husu ba SEFOPE atu halo teste ba área peska nian, tenke hili ida-ne’ebé hatene nani nune’e hetan asidente karik sira bele proteje-an. Ha’u husu ba área peska nian, hakarak ka lakohi tenke tau kritériu ida hatene nani mak bá serbisu iha Koreia Súl,” Deputadu Natalino dos Santos hateten iha sala plenária.
Notísia relevante : SEFOPE planeia fó treinamentu ba traballadór timoroan iha área peska antes ba rai-li’ur
Nia nota, traballadór mout ba tasi la’ós foin akontese maibé dala barak ona, tanba ne’e nia husu ba SEFOPE atu tau-atesaun ba asuntu ne’e ho di’ak.
Iha fatin hanesan, Deputada Bankada Frente Revolusionária Timor-Leste Independente (FRETILIN), Lídia Norberta dos Santos hateten, nu’udar reprezentante povu hato’o sentidu kondolénsia ba traballadór timoroan Domingos da Costa ne’ebé mate iha Koreia Súl.
Nia dehan, traballadór ne’e bá serbisu iha Koreia Súl hahú iha tinan 2023, nune’e serbisu durante tinan-rua de’it no iha loron 10 Outubru 2025 mout bá tasi maibé konsege hetan ona.
“Husu ba SEFOPE atu haree didi’ak serbisu kooperasaun iha área peska ne’e atu traballadór sira-nia situasaun iha ne’ebá bele garantidu,” nia tenik.
Jornalista : Arminda Fonseca
Editora : Julia Chatarina
