DILI, 13 Outobru 2025 (TATOLI)—Diretór Jerál Sekretária Estadu Formasaun Profisionál no Empregu iha Sekretária Estadu Formasaun Profisionál no Empregu (SEFOPE), Carlito Rosário Cabral, hateten ba oin sira sei planeia prepara treinamentu prátika ba trabaaldór timoroan sira neʼebé selesionadu ba área prioridade sira liuliu iha área peska durante fulan tolu molok ba servisu iha rai-li’ur.
Nia hatutan, traballadór timoroan sira ne’ebé hakarak ba servisu iha Korea no hili área peska ladun iha preparasaun másimu ba sira-nia área ne’e rasik liuliu kona-ba maneira atu nani iha bee-laran.
“Dalaruma traballadór sira ne’e laiha koñesimentu kona-ba peska nian maibé sira nafatin hakarak hili iha área peska tanba oportunidade ba servisu iha área ida-ne’e mak barak liu,” Diretór Jerál ne’e relata ba jornalista sira iha Palásiu Governu, segunda ne’e.
Nia dehan, traballadór timoroan sira-ne’e barak-liu mak servisu iha área peska nian maske ladun iha kapasidade ne’ebé naton hodi garante sira-nia servisu, entaun ninia konsekuénsia mak dalaruma fulan rua ka tolu, sira seidauk toman to’o kle’ur ona mak sira foin adapta ho ambiente tasi nian.
Tamba ne’e, ohin, Primeiru-Ministru mós propoin ona kestaun ne’e ba SEFOPE atu oinsá prepara treinamentu prátika ida ba kada área ne’e traballadór sira hili hodi ba servisu iha Korea, maske seidauk bele dehan bainhira mak atu implementa maibé ne’e sei sai planu prioridade ida ba sira-nia servisu.
“Ami sei koordena ho sentru formasaun sira hodi prepara mekanizmu di’ak hodi garante timoroan sira-nia kapasidade, la’ós husi formasaun ba lian de’it maibé oinsa hatene mós prátika ba área servisu nian atu labele fó impaktu ba sira-nia an,” nia hateten.
Entretantu, total traballadór timoroan ne’ebé servisu iha Korea hamutuk na’in-7.000-resin, no traballadór hirak ne’ebé mate iha Korea hahu husi tinan 2012 to’o 2025 hamutuk na’in 17.
Jornalista : Alexandra da Costa
Editór : Cancio Ximenes
