DILI, 14 Outubru 2025 (TATOLI)–Komadu Polísia Nasionál Timor-Leste (PNTL) liuhusi Komandante Jerál, Komisáriu Polísia Henrique da Costa, hatún ona despaisu hodi halo prosesu disiplinár ba membru ne’ebé tiru nia kaben iha Ai-Muti, foin lalais ne’e.
“Prosesu disiplinar ne’e Komandante Jerál nia kompeténsia. Komandante sei tetu buat hotu ne’ebé iha ligasaun ba komportamentu ne’ebé mak nia (suspeitu) halo ligasaun ho risku ne’ebé mak nia halo ba sidadaun ruma, espesialmente ba nia feen, Komandante Jerál mak hasai nia desizaun,” Portavós Komandu Jerál PNTL, Superintendente Polísia João Belo dos Reis hateten ba Jornalista sira liuhusi konferénsia imprensa ne’ebé hala’o iha Komandu Jerál PNTL, Kaikoli, Tersa ne’e.
Notísia relevante : PNTL detein ona membru tiru nia kaben iha Ai-Mutin
Servisu Investigsaun Kriminál konklui ona prosesu kriminál hodi aprezenta ba Ministériu Públiku.
“Prosesu ne’ebé mak ami halo aliña ho Tribunál, ami-nia lei hateten katak kuandu hetan kastigu tinan-tolu ba leten ne’e, nia (suspeitu) laiha direitu atu tama fali iha Polísia. Ami-nia regra ketak oituan, ne’ebé saida maka ami halo maka membru ne’ebé komete krime depois Konsellu Superiór Polísia hasai bazeia ba nia aktu ne’ebé nia halo,” nia akresenta.
Bainhira Konsellu Superiór hasai nia desizaun maka sei submete ba Ministeriu Interiór atu tetu.
Jornalista : Natalino Costa
Editora : Julia Chatarina
