DILI, 20 Outubru 2025 (TATOLI)—Ekipa Buibere Football Club (FC) garante sei hala’o jogu kompetitivu iha kompetisaun primeira divizaun Liga Futeból Femininu Timor-Leste (LFFTL).
Treinadór Prinsipál Buibere FC, Fabiano Expedito esplika hafoin gaña vitória kontra Maranatha ho skor 6-0, nia parte garante no sei prepara di’ak liután ekipa atu kompete iha primeira divizaun LFFTL.
“Sim. Ami garante. Maibé, kompetisaun sei naruk. Importante mak ami bele hadi’a fallansu ne’ebé ohin ami halo hodi hasoru jogu sira tuirmai,” Fabiano informa ba TATOLI iha Estádiu Munisipál Dili, Segunda ne’e.
Mezmu nune’e, Fabiano lakohi dezakredita ekipa adversária sira hanesan iha jornada dahuluk manán hasoru Maranatha FC, más importante nafatin treinu hodi garante rekolla pontu iha jogu sira tuirmai.
Nia hateten fallansu ne’ebé ekipa halo iha jogu dahuluk mak matein jogadór sira-nia kalma tanba kuaze maioria ansi hodi lakon oportunidade prodús golu.
“Ami sempre hakarak manán maibé rezultadu jogu mak sei determina,” Fabiano tenik.
Entretantu, Buibere rekolla pontu tolu iha tabela klasifikasaun hafoin manán Maranatha FC 6-0 no tuir oráriu LFFTL ne’e sei hala’o jogu jornada daruak kontra UNITAL FC iha Estádiu Munisipál Dili.
Jornalista: Natalino Belo
Editór: Xisto Freitas da Piedade
