DILI, 10 Jullu 2026 (TATOLI)—Governu liuhusi Ministru Obra Públika (MOP), Samuel Marcal, husu Agência TATOLI kontinua sai esperansa ba povu liuhusi produtu jornalístiku.
Ministru Obra Públika, Samuel Marçal, agradese tebes ba papel mídia nian ne’ebé servisu maka’as, partisipasaun no kontribuisaun importante tebes ba povu tomak bele akompaña Timor-Leste nia prosesu dezenvolvimentu.
“Entaun, povu hotu bele akompaña prosesu hotu tanba liuhusi imi-nia esforsu. Ha’u pesoalmente agradese tebes ba imi-nia envolvimentu mídia Tatoli inklui mídia sira seluk,” Ministru Samuel Marcal hateten ba ba Agência Tatoli relasiona ho aniversáriu Tatoli ba da-X (27 Jullu 2016 to’o 27 Jullu 2026) ne’ebé sei selebra iha 27 Jullu 2026, iha nia kna’ar fatin, Kaikoli, ohin.
Governante ne’e dehan, ho TATOLI nia kontribuisaun mak povu la falta informasaun diariamente, importante mak buka informasaun no transmite lia-loos ho loloos.
“Tanba ne’e, órgaun mídia sira tenke aprende ho didi’ak tanba ita-nia profisionalizmu ne’e karun. Imi labele konsidera imi-nia an hanesan tiktokers maibé tenke define kualidade informasaun. Labele hanoin atu halo baralla situasaun ka buka viewers, maibé sai esperansa ba povu,”, nia rekomenda.
Ajénsia TATOLI, I.P nu’udár ajénsia ofisiál Estadu Timor-Leste nian. Ezisténsia TATOLI, I.P. maihusi inisiativa Sekretaria Estadu Komunikasaun Sosiál (SEKOMS), iha 2012-2017 nu’udár transformasaun husi ETNA (East Timor News Agency), ne’ebé nakfilak ba ANTIL (Ajénsia Notisioza Timor-Leste).
Ajénsia Estadu ne’e hetan aprovasaun iha Konsellu-Ministru no públika iha Jornál Repúblika iha loron 14 Marsu 2016, nu’udár embriaun ho naran ANTIL ne’ebé lansa iha 27 Jullu 2016. Fulan-Marsu 2017, Konsellu-Ministru aprova ANTIL sai TATOLI, nu’udár ajénsia ofisiál Estadu Timor-Leste nian no publika iha Jornál Repúblika, ho estatutu nu’udár Institutu Públiku (I.P.).
Objetivu estabelese ajénsia TATOLI, I.P. sai fonte informasaun ofisiál Estadu Timor-Leste neʼebé iha kapasidade elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál bazeia ba natureza no karakterístika; rapidéz no rigór, maibé labele ignora nia rigorozidade hanesan akurásia, indepedente, inzenta, klareza no nafatin iha integridade no mós kredibilidade.
Jornalista : Alexandra da Costa
Editór : Cancio Ximenes
