VIKEKE, 24 Outubru 2025 (TATOLI)—Diretora Jestaun Merkadu no Turizmu (JMT) Munisípiu Vikeke, Mirandolina Fátima da Costa Guterres informa JTM halo identifikasaun ona ba sítiu turístiku ne’ebé eziste iha Munisípiu Vikeke hamutuk 69.
“Ami halo ona levantamentu ba sítiku turístiku sira-ne’ebé sai icon Munisípiu Vikeke hamutuk 69. Husi sítiu ne’e, ita fahe tipu tolu mak hanesan sítiu naturál, sítiu istóriku no sítiu relijiozu,” Mirandolina Fátima da Costa ba TATOLI iha resintu Administrasaun Munisípiu Vikeke, Sesta ne’e.
Diretór JMT ne’e relata, sítiu sira-ne’e eziste iha postu administrativu lima mak hanesan iha Postu Lakuta sítiu turístiku hamutuk 14 seidauk dezenvolvidu, maibé iha tinan 2026 sítiu ida mak sei dezenvolve mak Uetasi. Sítiu iha Postu Ossú hamutuk 21. Husi númeru ne’e 17 seidauk dezenvolvidu, nune’e iha 2026 planu dezenvolve sítiu Baneo no sítiu haat mak dezenvolvidu ona.
Iha Postu Administrativu Uatulari, sítiu turístiku hamutuk sia (9). Sítiu ida mak dezenvolvidu ona, maibé sítiu ualu mak seidauk dezenvolvidu. Entre sítiu ualu ne’e, iha ida mak tama ona planu 2026 hodi dezenvolve.
Iha Postu Administrativu Uatukarbau, sítiu turístiku hamutuk haat (4) seidauk dezenvolvidu hotu. Enkuantu, sítiu turístiku iha Postu Vikeke Vila hamutuk 21. Husi númeru ne’e, sítiu rua mak dezenvolvidu ona no sítiu 19 mak seidauk dezenvolvidu. Sítiu ida mak tama ona planu 2026 atu dezenvolve.
“Husi sítiu sira-ne’e ita identifika tuir tipu sítiu turístiku sira-ne’ebé iha Munisípiu Vikeke mak hanesan sítiu natureza iha 27, sítiu istóriku hamutuk 30 no sítiu relijioza hamutuk 12,” nia subliña.
Tuir Mirandolina, sítiu turístiku sira-ne’e mak sai poténsia ba Munisípiu Vikeke, tan ne’e bainhira dezenvolve di’ak sei atrai vizitór sira tantu lokál, nasionál no internasionál.
Jornalista: Vitorino Lopes da Costa
Editór: Xisto Freitas da Piedade
