OEKUSI, 24 Outubru 2025 (TATOLI) – Kuda hamutuk 42 konsege tama ba faze finál iha kompetisaun korrida kuda Rejiaun Administrativa Espesiál Oekusi Ambeno (RAEOA) hodi komemora loron mundiál risku dezastre ne’ebé organiza hosi Sekretáriu Estadu Protesaun Sívil (SEPS).
Iha atividade kompetisaun finál ne’e, ensera husi Sekretáriu Estadu Protesaun Sívil (SEPS) Domingos Mariano Reis, hodi enkoraja kuda na’in-sira, atu kontinua haki’ak kuda atu kontinua prepara ba kompetisaun, nu’udar desportu kulturál ida iha Timor-Leste.
“Ohin ita halo enserramentu ba kompetisaun corrida cavalo. Animasaun kuda ne’e hanesan kultura Oekusi nian, faz parte husi desportu ninian, ne’e importante tebes ita tenke kuida atu kontinua nafatin, atu ita-nia jerasaun ba jerasaun labele haluha desportu sira hanesan corrida cavalo iha RAEOA ne’e,” nia hateten.
Notísia relevante:Kuda 56 kompete iha Oekusi hodi selebra loron mundiál risku dezastre
Governante ne’e observa katak, kampu korrida ne’e presiza hadi’a tanba lutu balun aas, kuda balun ki’ik, entaun fó risku ba sira-ne’ebé sa’e kuda.
“Entaun hanesan Sekretáriu Estadu Protesaun Sívil no ohin mós husi Prezidente komisaun rekoemnda ona, husu nafatin ba Autoridade RAEOA atu tau atensaun ba pista ne’e, se bele ita tau tan besi ruma iha okos nune’e labele fó risku ba kuda no sira-ne’ebé sa’e kuda, tanba kada tinan ita mak utiliza kampu ne’e,” nia rekomenda.
Prezidente Asosiasaun Corrida Cavalo Oekusi Ambeno (ACCOA), Mario Muni Salu, informa katak, antes ne’e kuda 56 mak rejista iha eventu kompetisaun ne’e maibé kuda 14 lakon iha faze kuatru-finál.
“Totál kuda ne’ebé rejista iha 56, maibé kuda ne’ebé tama ba kompetisaun finál ne’e 42,” nia hateten iha ámbitu finál, hala’o iha pista kuda iha suku Cunha sub-rejiaun Pante Makasar.
Ezekutivu ne’e la esplika detallu kona-ba montante orsamentu atu entrega ba vensedór sira, maibé parte komisaun hamutuk ho Autoridade Protesaun Sívil (APC) prepara ona atu atribui husi vensedór haduluk to’o vensedór daneen.
“Sira (kuda) 42 ne’e sei hetan prémiu hotu, hahú husi primeiru lugar to’o sextu lugar, nu’udar motivasaun atu kontinua haki’ak kuda, no bele tula kuda sira fila fali ba idak-idak nia suku, tanba kuda sira-ne’e mai husi sub-rejiaun haat, Oésilo, Pássabe, Nítibe no Pante Makasar,” nia hateten.
Notísia relevante:ACCOA husu Autoridade RAEOA orienta empreza finaliza projetu pista kuda iha Cunha
Entretantu, oraríu atividade kompetisaun korrida ne’e hahú kompetisaun iha loron tersa-feira 21 Outubru, iha kuarta-feira kontinua ba semi-finál, no kompetisaun finál sei akontese iha loron kinta-feira 23 Outubru 2025.
Tuir observasaun jornalista Ajénsia Tatoli,I.P nota katak, durante eventu kompetisaun ne’e la’o, hetan apoia seguransa másimu husi Komandu PNTL Oekusi no hetan apoia mós husi Serbisu Nasionál Ambulánsia Emerjénsia no Medikamentu, Institutu Públiku (SNAEM,I.P).
Jornalista: Abílio Elo Nini
Editór: Rafael Ximenes de A. Belo
