AILEU, 10 Novembru 2025 (TATOLI)-Prezidente Autoridade Munisípiu Aileu, João Bosco dos Santos, husu ba Governu atu kontinua dezenvolve turizmu komunitáriu iha Seloi Kraik ne’ebé durante ne’e abandonadu.
“Ami iha Seloi kraik iha turizmu komunitáriu maka Lagoa ne’e rasik, maibé fatin ne’e agora abandonadu tanba laiha investimentu ruma”, nia hato’o.
Antes ne’e, fatin referidu iha responsabilidade husi Sekretaria Estadu Formasaun Profisionál no Empregu maka dezenvolve Lagoa ne’e sai fatin turístiku ne’ebé furak hodi atrai ema hotu vizita.
“Fatin seidauk abandonadu ne’e ema barak mak mai foto iha fatin ne’e no ami mós hetan rendimentu ruma husi vizitante sira, maibé agora la’e ona. Tanba ne’e, husu ba Governu atu kontinua haree kestaun idaa1ne’e”, nia sujere.
Iha biban ne’e, Primeiru-Ministru, Xanana Gusmão, hatán ba rekomendasaun husi autoridade munisipál Aileu nian katak kona-ba turizmu komunitária iha hela prosesu bainhira OJE 2026 aprova Governu sei kria Banku Dezenvolvimentu ne’ebé lahanesan ho BNCTL, tanba sira apoia de’it, maibé BNDTL atu apoiu komunidade, liuliu setór privadu hodi halo kréditu.
“Inisiativa ne’e tanba joven barak maka iha talentu no interese atu dezenvolve sira-nia produtu rasik hodi hetan despeza ruma”, Xefe Governu dehan.
Nia rekomenda mós atu turizmu komunitáriu neme la presiza atu halo otél boot, maibé halo tuir kbiit komunidade nian no importante mak seguru ba ema hotu atu bele vizita.
“Ho prezensa BNDTL sei fó biban ba komunidade halo empréstimu hodi kria postu traballu ba sira-nia an rasik tuir kapasidade ne’ebé iha. Prepara imi-nia fatin ba ema vizita, promove mós imi-nia produtu lokál sira”, nia hateten.
Jornalista: Alexandra da Costa
Editora: Maria Auxiliadora
