KOVALIMA, 10 Novembru 2025 (TATOLI)- Servisu Munisípiu Edukasaun Kovalima rejista Profesór na’in-116 maka tama iha lista reforma obrigatóriu.
“Tuir dadus ita-nia profesór ne’ebé tama iha lista reforma obrigatóriu hamutuk 93 no profesór ne’ebé moras permanente na’in-23 hamutuk profesór na’in-116 “, Diretór Servisu Munisípiu Edukasaun Kovalima, Elda de Fátima, dehan ba jornalista iha resintu AMC, ohin .
Manorin na’in-116 hahú fulan-Janeiru 2026 sei la hanorin ona alunu sira tanba sira-nia naran tama ona lista reforma obrigatóriu, nune’e atu halo subsituisaun Ministériu Edukasaun sei halo rekrutamentu ba profesór sira.
Dirijente Edukasaun Kovalima dehan profesór ne’ebé maka tama iha lista reforma obrigatóriu sira-nia dokumentu haruka ona ba Nasionál liuliu ba Komisaun Funsaun Públiku (KFP) atu bolu ona sira.
Manorin ne’ebé tama iha lista reforma obrigatóriu maioria monorin husi Eskola Bázika Centrál (EBC) hamutuk 24 ho nia filiál 94 ne’ebé estabelese iha postu administrativu Fatululik, Fatumea, Fohorem, Tilomar, Maucatar, Suai no Zumalai.
Profesor hirak ne’e mai husi husi Eskola Pre-eskolár (EPE), Ensinu Báziku Centrál (EBC), Ensinu Sekundáriu (ES) no Ensinu Tékniku Vokasionál (TECVOK) ne’ebé hanorin iha Covalima hamutuk 982, husi númeru ne’e mane 589 no feto 393.
Lembra katak iha 2024, Ministériu Edukasaun (ME) koloka ona profesór liu iha bolsa kandidatura ne’ebé liu vaga hamutuk 29. Husi númeru iha fahe dahuluk kokola na’in-13 no ba faze daruak koloka na’in-16, nune’e Servisu Edukasaun Kovalima koloka ona ba eskola sira ne’ebé falta profesór.
Notisia relevante: Funsionáriu na’in-127 iha Kovalima tama lista reforma obrigatóriu
Jornalista: Celestina Teles
Editór : Florencio Miranda Ximenes
