DILI, 17 Novembru 2025 (TATOLI)—Ekipa Na’in-Feto FC kontinua derrota iha kompetisaun primeira divizaun jornada dahaat Liga Futeból Femininu Timor-Leste (LFFTL) bainhira kontra S’amuser FC ho skor 0-6.
Na’in-Feto ne’ebé promovida husi segundu divizaun to’o jornada dahaat seidauk rekolla pontu ruma no matein pozisaun dasiak iha tabela klasifikasaun LFFTL.
Rezultadu ida-ne’e elementu Bernardino Soares hetan bainhira kontra S’amuser iha-ne’ebé jogu parte dahuluk ramata ho skor 0-4 ne’ebé jogadora husi S’amuser prodús liuhusi Igilda Ximenes iha minutu ida (1), Natália Lawa minutu ualu (8), Fereria Soriano iha minutu 14 no Nívia Bahkita iha minutu 24.
Notísia relevante: LFFTL, AD SLB manán Na’in-Feto, Maudoko impata ho Maranatha
Iha parte daruak, Na’in-Feto ne’ebé aplika estratéjia defensiva nafatin sofre golu rua husi S’amuser bainhira jogadora Nívia Bahkita enxe tan golu iha minutu 72 no Suzana Soares iha minitu 84 hodi hakotu jogu ho rezultadu ikus 0-6.
Ho rezultadu jogu ne’ebé hala’o iha Estatutu Munisipál Dili, Domingu (16/11/2025) ne’e, rezulta S’amuser FC hakat bá pozisaun daruak tabela klasifikasaun ho pontu 12 hafoin manán haat (4) husi jogu haat (4).
Jornalista: Natalino Belo
Editór: Xisto Freitas da Piedade
