GINÉ-BISAU, 22 Novembru 2025 (TATOLI) – Ekipa Misaun Observasaun Eleitorál (MOE), g7+, sábadu ne’e, partisipa iha enkontru ne’ebé organiza hosi Komunidade Ekonómika Estadu Áfrika Osidentál (CEDEAO, sigla portugés) no Misaun Observasaun Eleitorál Uniaun Áfrikana.
Diretór Operasionál g7+, Felix Piedade, informa katak enkontru referidu nu’udar enkontru tradisionál entre xefe misaun observadór internasionál sira ne’ebé sei halo observasaun ba eleisaun Prezidensiál no Parlamentár Giné-Bisau nian ne’ebé sei realiza iha 23 Novembru 2025.
“Ohin ne’e kada misaun husi organizasaun internasionál sira hamutuk fahe informasaun ba malu kona-ba observasaun ne’ebé ita sei halo ba eleisaun Prezidensiál no Parlamentár ne’ebé sei realiza aban”, Felix Piedade ba Tatoli iha Otél Ceiba, ohin.
Diretór Operasionál ne’e esplika, objetivu prinsipál husi enkontru ne’e mak kada organizasaun observadór internasionál sira atu partilla saida mak sira halo ona no saida mak atu halo hahú aban eleisaun no depoizde eleisaun.
“Rezultadu konkretu husi enkontru ne’e mak husi meza propoin atu iha tan enkontru tuir fali mai depoizde eleisaun, enkontru halo kedas iha segunda feira, konvida filafali xefe delegasaun hotu atu fahe rezultadu prelimináriu nune’e tau hamutuk atu bele suporta Governu Giné-Bisau no mós CNE Giné nian atu bele halo di’ak liután iha futuru”, nia dehan.
Tanba iha mensajen iha enkontru ne’e ein-jerál kada misaun, tuir ezekutivu ne’e, aprezenta hothotu iha informasaun ne’ebé hanesan katak hothotu konkorda situasaun eleisaun ne’e la’o di’ak no komunidade iha liberdade hodi espresa sira-nia hanoin.
“Ohin mós relatóriu kada misaun hatudu mensajen kuaze atu hanesan katak kona-ba líder partidu polítiku sira husi Governu nomós opozisaun iha Giné sira rasik hothotu iha hanoin hanesan atu asegura pás, estabilidade tanba sira lakohi nasaun ne’e filafali ba kotuk hanesan konflitu maibé hakarak la’o ba oin”, nia subliña.
Iha fatin hanesan, Xefe Misaun Observasaun Eleitorál g7+, Christina Joanna Mitini, hateten enkontru ohin g7+ nia parte ko’alia kona-ba atividade saida de’it mak ekipa ne’e halo durante to’o Giné-Bisau.
“Entaun ita-nia parte relata mak atividade ne’ebé ita halo ona hanesan hasoru malu ho partidu polítiku sira, Komisaun Nasionál Eleisaun, inklui mós halo observasaun ba votasaun antesipada ba Militár no Polísia sira inklui horseik halo observasaun ba kampaña ikus husi partidu polítiku sira”, nia dehan.
Nia esplika, iha enkontru ohin mós halo halo introdusaun badak kona-ba g7+ ne’ebé estabelese iha 2010 iha Timor-Leste, g7+ hanesan organizasaun interngovermentál ne’ebé halibur nasaun 20 ne’ebé afetadu husi frajilidade no konflitu. Misaun prinsipál husi grupu ne’e maka ajuda nasaun membru sira hetan pás estabilidade no reziliénsia.
Tuir nia, g7+ iha nia kuartel Jerál iha Dili Timor-Leste, no sede ne’ebé loke iha Lisboa iha tinan-2017 no Nova lorke iha fulan-Setembru 2024.
g7+ iha servisu prioridade tolu mak hanesan halo advokasia kona-ba harii pás no harii Estadu iha nível globál, fahe esperiénsia entre nasaun membru sira ho naran kooperasaun frajil ba frajil no programa ikus liu mak hametin instituisaun.
Kooperasaun frajil ba frajil foka ba área hanesan fahe esperiénsia iha jere rekursu naturál, asesu ba justisa, pás no rekonsiliasaun, no Misaun Observasaun Eleisaun.
“Objetivu husi Misaun Observasaun Eleitorál maka atu observa prosesu eleisaun iha nasaun membru sira hodi asegura katak eleisaun hala’o ho livre, justu, pás no demokrasia. Inisiativa ne’e mos hanesan momentu importante hodi fahe esperiénsia entre nasaun membru hodi organiza eleisaun ne’ebé di’ak no susesu, hodi asegura transferénsia poder ne’ebé di’ak, ikusmai kontribui ba dame, estabilidade polítika no dezenvolvimentu sustentável nasaun”, konklui.
Iha fatin hanesan, Xefe Misaun Observasaun Eleitorál Uniaun Áfrikana, Filipe Jacinto agradese parte hotu ne’ebé sei halo observasaun ba eleisaun jerál Giné-Bisau nian no husu mantein estabilidade, transparénsia no seluktan.
Organizasaun observadór internasionál ne’ebé sei halo observasaun ba eleisaun jerál Giné-Bisau nian mak hanesan, CEDEAO, MOE Uniaun Áfrikana, g7+, MOE Komunidade País Ko’alia Lian Portugés (CPLP sigla portugés) no seluktan.
Jornalista : Arminda Fonseca
Editór: Rafael Ximenes de A. Belo
