VIKEKE, 27 Novembru 2025 (TATOLI)–Autoridade Munisípiu Vikeke hamutuk ho populasaun, Kinta ne’e, husu misa agradesimentu ba eroi sira relasiona ho Selebrasaun Loron Proklamasaun Independénsia RDTL ba da-50 (28 Novembru 1975-28 Novembru 2025).
Misa agradesimentu ne’e, Amu Selebrante, Pe. Tomás de Aquino haktuir misa ida-ne’e hanesan grasa hodi hasa’e agradese ba Na’i-Maromak ba tinan 50 Proklamasaun Independénsia.
“Momentu ida-ne’e sai momentu istóriku atu ita timoroan sira hotu buka hasa’e ita-nia agradesimentu ba Maromak. Laiha buat ida-ne’ebé furak liu, mak ita-nia orasaun hahí no agradese ba Maromak. Husu nafatin Maromak nia tulun no bensaun sira ba ita-nia rai doben Timor-Leste,” Pe. Tomás dehan iha Igreja Parókia Vikeke Vila.
Nia haktuir selebrasaun ida-ne’e fanu filafali timoroan ida-idak, atu husu ba idak-idak ninia-aan katak saida mak bele fó hodi kontribui ba prezente nian.
“Hirak-ne’ebé uluk saran-aan ona ba nasaun ida-ne’e no sakrifika sira-nia vida tomak ba mehi ukun rasik-aan, sira-ne’e sai hanesan memória no sai hanesan istória. Maibé, eroi sira sai espíritu ida ba ita hirak-ne’ebé sei moris katak saida mak ita bele kontribui atu lori nasaun ida-ne’e ba prosperidade?,” Amu subliña.
Tuir nia katak iha selerasaun ida-ne’e la’ós ho haksolok ka festeja de’it, maibé sai momentu ida atu refelete filafali, hodi ema hotu-hotu halo avaliasaun ba idak-idak nia aan tuir kna’ar no profisaun.
Iha biban hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, hateten komemorasaun Loron Proklamasaun Independénsia ba da-50 povu Timor-Leste hakur dezafiu oioin hafoin atinje mehi ba ukun rasik-aan.
“Ohin ita selebra loron ida-ne’e liuhusi ita-nia inan-aman no eroi sira hamutuk mak lori ita bá 30 Agustu 1999 hodi hakotu funu. Tan ne’e mak ita ohin bele komemora, nune’e ha’u hato’o parabéns ba pavu Vikeke no povu Timor-Leste tomak,” nia tenik.
Aleinde ne’e, Prezidente Komisaun Organizadora ba Komemorasaun 28 Novembru, Fernando Soares, hato’o agradesimentu ba amu selebrante ne’ebé prezide misa agradesimentu ba Selebrasaun 28 Novembru ba da-50 ne’ebé selebra iha Munisípiu Vikeke.
Hafoin misa ramata, sarani no autoridade munisípiu no veteranu kontinua lori ai-funan no lilin ba kari ba semitériu eroi iha Kraras.
Entretantu, misa agradesimentu ne’e partisipa husi Ministru Agrikultura, Peska, Pekuária no Floresta, Marcos da Cruz ho nia ekipa, autoridade lokál, veteranu, komandante Polísia Nasionál Timor-Leste (PNTL) Munisípiu Vikeke, funsionáriu, komunidade no estudante sira.
Jornalista: Vitorino Lopes da Costa
Editór: Xisto Freitas da Piedade
