DILI, 28 Novembru 2025 (TATOLI)–Antigu Primeiru-Ministru, Atuál Sekretáriu Jerál Partidu Frente Revolusionária Timor-Leste Independente (FRETILIN), Marí Alkatiri dehan nia rejeita simu kondekorasaun hosi Prezidente Repúblika, José Ramos-Horta hamutuk daruak ona tanba povu barak sei moris iha mukit laran.
“Ha’u rejeita kondekorasaun daruak ona husi Prezidente Repúblika. Enkuantu povu sei ki’ak no mukit, ha’u lakohi atu simu kondekorasaun. Ita ba fahe kondekorasaun hanesan nasi bungkus no nasi kotak ne’e lae,” nia dehan ba jornalista sira hafoin partisipa iha tinan 50 selebrasaun Loron Proklamasaun Independénsia RDTL, iha resintu Palásiu Governu, Sesta ne’e.
Nia realsa katak nia sei la luta atu hetan kondekorasaun maibé luta atu serbí povu no rai ida-ne’e.
“Ha’u la luta atu hetan kondekorasaun. Ha’u luta atu serbí povu. Atu kondekora tenke iha diálogu entre ha’u ho ema ne’ebé atu kondekora ha’u,” Marí tenik.
Entretantu, relasiona ho diskursu Prezidente Repúblika, José Ramos Horta nian iha Komemorasaun Proklamasaun Independénsia RDTL ne’ebé la temi hotu líder istóriku sira-nia naran, Sekretáriu Jerál FRETILIN konsidera katak líder sira kontinua iha ódiu no vigansa ba malu.
Nia dehan bainhira ba rai-li’ur sira hatudu katak entre líder sira laiha ódiu no vigansa ba malu maibé realidade iha rai-laran kontinua iha ódiu no vigansa.
“Klaru, sei iha ódiu no vigansa entre líder sira iha rai-laran. Ita iha rai-li’ur dehan ita laiha ódiu no vigansa, más iha rai-laran eziste ódiu no vigansa nafatin,” Marí informa.
Jornalista: Osória Marques
Editór: Xisto Freitas da Piedade
