DILI, 29 novembru 2025 (TATOLI) – East Timorese Association Peterborough (ETAP) charity organiza selebrasaun tinan-50 proklamasaun unilaterál independénsia Timor Leste iha sidade Peterborough, Reinu Unidu, sexta (28/11).
Marka prezensa iha selebrasaun importante no istóriku ida-ne’e mak estrutura ETAP, Parish Council, komunidade Timoroan, voluntáriu sira, reprezentante husi komunidade sira seluk hodi hametin relasaun Timoroan sira-nian no divulga istória no kultura Timor nian.
Prezidente ETAP, Celso Oliveira, iha diskursu hateten, selebrasaun proklamasaun independénsia ne’e hakarak fó omenajen ba éroi sira-nia luta ba independénsia nasionál.
“Momentu ida-ne’e parte husi istória Timo- Leste nian. Ho komemora data importante ne’e, Diáspora ajuda tebes halo istória ne’e moris, hodi konta ba jerasaun foun sira istória independénsia nasionál,” líder másimu ETAP ne’e hateten, tuir komunikadu ba TATOLI, ohin.
Selebrasaun sira ne’e, tuir Celso Oliveira, bele serve hodi prezerva no reforsa identidade kulturál.
“Ida-ne’e oportunidade hodi hametin relasaun amizade entre Timoroan, konekta ho rais, tradisaun no istória ne’ebé partilla, halo sentidu orgullu no hametin unidade iha Diáspora liu-liu timoroan iha Peterborough hodi garante katak moris memória luta ba independénsia hosi komunidade ida forti nafatin,” nia énfaze.
Sekuénsia, selebrasaun hahú hosi kanta inu nasionál PÁTRIA, PÁTRIA, tuirmai lee textu proklamasaun Independénsia hosi Demetrio Silva nudar membru ETAP, tuir fali Um minuto de silêncio diriji hosi Estanislau Ximenes, tuir kedas diskursu hosi presidente ETAP Celso Oliveira, ko’a cake no ramata ho han-hemu hahan Timor-Leste nian no múzika Tebe-tebe.
Peterborough nu’udar sidade ida dezde 2002 halibur Timoroan besik rihun ida entre mane no feto, ferik no katuas, foinsa’e, fetoran no labarik sira. Inan-aman servisu maka’as iha fábrika maibé oan sira frekuenta ensinu-aprendizajen komesa husi eskola primária, sekundária, kolégiu no universidade.
TATOLI
