DILI, 02 Dezembru 2025 (TATOLI)—Governu Repúblika Demokrátika Timor-Leste manifesta nia solidariedade maka’as ba povu no Governu Indonézia, Srilanka, Tailándia, Malázia no nasaun seluk iha Sudeste Aziátiku ne’ebé hetan afetadu husi inundasaun no deslizamentu rai, ne’ebé fó impaktu halo ema mate 1000-resn, ema rihun lakon no ema rihun mak sai dezlokadu..
Primeiru-Ministru, Xanana Gusmão, lori Governu no povu Timor-Leste nian espresa nia sentimentu profunda no solidariedade ba populasaun nasain hirak ne’e, ne’ebé terus tanba temperatura tropikál ne’ebé halo inundasaun no dezlizamentu rai devastadór sira.
“Ami laran triste tebes ho dimensaun trajédia ne’e, no imajen husi inundasaun no komunidade dezlokadu hetan ho tristeza boot iha Timor-Leste,” Xefe Governu informa liuhusi komunikadu imprensa ne’ebé Ajénsia Tatoli asesu, ohin.
Portavós Governu no Ministru Prezidénsia Konsellu Ministru, Agio Pereira, hatutan iha momentu difisíl ne’e, Governu Timor-Leste husu nafatin atu buka tuir sobrevivente sira hodi fó asisténsia.
“Ami hanoin hela ho vítima sira no sira-nia família no ami hato’o ba ekipa sira-ne’ebé kontinua dedika sira-nia an hodi buka sobrevivente sira no halo asisténsia ba komunidade afetadu sira,”nia dehan.
Governante ne’e afirma, ho forsa no reziliénsia husi nia povu, nasaun sira-ne’e sei rekobra no rekonstrui fali, Timor-Leste nafatin solidáriu ho maun alin sira iha Ázia ne’e.
Inundasaun no dezlizamentu rai ne’ebé liu iha Sudeste Aziátiku mak sai episódiu devastadór liu iha tinan hirak ne’e, operasaun resgata no asisténsia nafatin iha rejiaun barak no kontinua buka nafatin ema-ne’ebé lakon.
Hanesan iha Indonézia, iha illa Sunatera nia li’ur, rejista númeru vítima boot liu, ho ema rihun mak mate no lakon, infrastrutura destruídu no komunidade izoladu.
Iha Srilanka, Tailândia no Malázia, autoridade sira deklarasaun situasaun emerjénsia iha zona barak, ne’ebé ema rihun hasoru perdesaun boot, balun mak evakua iha sentru temporáriu no problema iha asesu ba servisu esensiál, edukasaun no meiu subsisténsia.
Jornalista : Alexandra da Costa
Editór : Cancio Ximenes
