DILI, 16 Dezembru 2025 (TATOLI) – Diresaun Nasionál Transporte Terrestre (DNTT), Ministériu Transporte no Komunikasaun (MTK) halo ona akizisaun ba blanku livrete (STNK) hamutuk 47.891, nune’e solisita ba públiku atu troka, iha semana oin, livrete provizóriu ba orijinál.
Xefe Departamentu Sekretariadu Apoiu Tékniku Administrasaun DNTT, Nelson Sequeira, dehan akizisaun ba blanku livrete no karta kondusaun prosesa iha aprovizionamentu iha fulan-Novembru 2025, ne’ebé tuir planu atu sosa hamutuk rihun 80-resin ho totál orsamentu rihun $185.
“Ba blanku livrete no karta kondusaun iha kinta semana kotuk, blanku livrete tama uluk ona hamutuk 47.891. Hakarak husu ba públiku, semana oin, bele mai ona DNTT hodi trata ona livrete sira ne’ebé durante ne’e hetan provizóriu bele mai troka ba orijinál”, Nelson Sequeira dehan ba Tatoli, iha Balide, ohin.
Kona-ba ba blanku ba karta kondusaun nia husu ba públiku pasiénsia uitoan, tanba sei to’o iha semana oin, nune’e bainhira tama sei informa ba públiku.
Ho blanku livrete ne’ebé tama ona, hahú ohin, ekipa DNTT sei distribui ba munisípiu Baukau, Kovalima, Lautein, Manufahi, Bobonaru no Vikek, no ba munisípiu seluk seidauk bele distribui tanba sei hein hela funsionáriu sira tuir formasaun mak foin distribui.
Notísia relevante: MTK aloka rihun $185 hodi sosa blanku ba karta kondusaun no livrete
Jornalista: Arminda Fonseca
Editora: Maria Auxiliadora
