BOBONARU, 18 Dezembru 2025 (TATOLI)-Emreza lokál Lesuburo Unipessoal Lda finaliza ona projetu konstrusaun ba muru protesaun iha mota Bolobu, iha suku Manapa, postu administrativu Kailaku, munisípiu Bobonaru, ho naruk kilómetru ida-resin.
Diretór empreza Lesuburo, Afonso Lelo Tasi, dehan tuir planu obra ne’e sei entrega ba Governu iha Janeiru 2026. “Ami garante obra ne’e kualidade, tanba serbisu tuir dezeñu husi Governu”, Afonso Lelo Tasi garante iha Maliana, ohin.
Aleinde ne’e, komunidade António Fontes sente kontente tanba obra ne’e bele proteje ona sira-nia to’os no natar.
“Se la’e mak tinan-tinan kuandu tempu udan ami halo natar la di’ak, tanba bee-mota tama hotu natar laran, lori hotu rai, depo’is natar-laran rai-henek mak nakonu. Tinan ida-ne’e ami sira natar iha moru ne’e nia kotuk ne’e fiar katak sei la akontese hanesan uluk sira liubá, tanba muru metin ona”, realsa.
Obra ne’e kompañia Lesuburo ezekuta ho valór kontratu $521.97,03. Projetu konstrusaun muru ne’e ho objetivu atu sátan bee-mota Bolobu hodi proteje komunidade nia to’os no natar iha área Haurema, Mautalo, no Raeana, inklui proteje estrutura ponte Bolobu no ponte Pakistaun.
Notísia relevante: Empreza rua hahú implementa projetu morru protesaun iha mota Bulobu
Jornalista: Sergio da Cruz
Editora: Maria Auxiliadora
