VIKEKE, 18 Dezembru 2025 (TATOLI)—Diretór Servisu Saúde Munisípiu (SSM) Vikeke, Aljaksono Soares Maia informa SSM Vikeke hamutuk ho Sentru saúde Vikeke Vila halo ona normalizsaun saneamentu, nune’e daudaun ne’e pasiente sira utiliza filafali ho di’ak.
“Preokupasaun husi komunidade no mós deputadu balun foin lalais levanta kona-ba saneamentu (sintina) nakonu iha sentru internamentu ne’e, horisehik ami buka meiu konsege normaliza fali ona. Agora ita-nia pasiente no família pasiente iha internamentu uza fali ona,” Aljaksono ba TATOLI iha Sentru Saúde Internamentu Vikeke Vila, Kinta ne’e.
Diretór SSM ne’e klarifika katak saneamentu iha Sentru Saúde Internamentu aat beibeik tanba posu cor ho beton, entaun bee labele tun ba rai okos halo sintina nakonu lalais.
“Kuandu nakonu ita bolu karreta xupa sintina nian difísil tanba iha Munisípiu Vikeke karreta xupa sintina laiha. Ita tenke bolu husi Dili. tanba ne’e mak ita hakarak rezolve lalais problema ne’e susar,” Aljaksono haktuir.
Iha fatin hanesan, Xefe Sentru Saúde Vikeke Vila, João Corte Real esplika durante saneamentu iha internamentu problema, pesoál saúde sira orienta pasiente sira ba asesu saneamentu iha ospitál tuan no ospitál malária nian.
Iha biban ne’e, reprezenta família pasiente, Januário Rangel da Silva, haktuir daudaun ne’e saneamentu iha Sentru Saúde Internamentu komunidade uza di’ak fila fali ona.
Entretantu, tuir dadus, pasiente ne’ebé sei kontinua hala’o tratamentu iha Sentru Saúde Internamentu hamutuk na’in-13 kompostu husi sala pedeatria na’in-ualu (8) no sala adultu ema na’in-hitu (7).
Jornalista: Vitorino Lopes da Costa
Editór: Xisto Freitas da Piedade
