DILI, 19 Dezembru 2025 (TATOLI)—Prezidente Tribunál Rekursu (PTR), Afonso Carmona, konvida Prezidente Repúblika, José Ramos-Horta, atu halo abertura ba Ano Judisiál dahuluk.
Inisiativa istóriku ida-ne’e, ne’ebé sei implementa ba dahuluk dezde restaurasaun independénsia tinan 23 liubá, ho objetivu atu harii tradisaun formál ida kona-ba transparénsia, prestasaun konta no komunikasaun entre poder judisiáriu no Estadu.
Durante sorumutu ne’e, Prezidente Tribunál Rekursu informa ba Xefe Estadu kona-ba sesuan solene ne’ebé planeadu ba sesta (19 Dezembru 2025) ne’e.
“Ha’u mai konvida ita-nia Prezidente atu halo abertura ba anu judisiál, durante ne’e ita la halo, anu judisiál ne’e katak atividade ne’ebé durante ne’e Tribunál halo, ida-ne’e mak iha 2025 nia rohan ne’e ita tenke realiza anu judisiál, durante tinan 20-resin ita la halo,” Prezidente Tribunál Rekursu (PTR), Afonso Carmona, hateten ba jornalista sira hafoin hasoru malu ho Prezidente Repúblika, José Ramos-Horta, iha Palásiu Prezidensiál Nicolau Lobato, ohin.
Nia dehan, eventu ne’e sei sai hanesan plataforma ba Ministériu Públiku, Defensoria Públika, Orden Advogadu sira no Tribunál sira atu aprezenta sira-nia relatóriu anuál ba tinan 2025.
Prezidente Ramos-Horta sei marka prezensa iha sesaun lorokraik nian hodi hato’o diskursu abertura no deklara loke formalmente Ano Judisiál 2026, nu’udar sinál ba era foun ida ba haforsa responsabilidade institusionál no konfiansa iha sistema justisa nian.
Hatán ba kuestaun husi média kona-ba prosesu judisiál sira-ne’ebé la’o hela, Prezidente Tribunál Rekursu enfatiza Prezidente nia respeitu ba separasaun podér no independénsia judisiál.
Nia nota katak maske “Ano Judisiál” promove komprensaun públiku kona-ba sistema justisa, kualkér prazu ba kazu espesífiku sira sei hela de’it iha kompeténsia juiz sira-nian ne’ebé kaer kazu no mós tuir rekizitu husi prosesu kontraditóriu legál nian.
Jornalista : Hortencio Sanchez
Editór : Cancio Ximenes
