OEKUSI, 23 Dezembru 2025 (TATOLI) – Hahú husi Janeiru mai to’o Dezembru 2025 ne’e, Departamentu Rejionál Transporte Terrestre Rejiaun Administrativa Espesiál Oekusi Ambeno (RAEOA), arrekada reseita ba kofre Estadu hamutuk rihun $147,777.00
“Janeiru mai to’o Novembru ita rekolla rihun $139,264,00, ba fulan-Dezembru hahú husi loron 01 to’o ohin 23 Novembru ita rekolla $8.513,00, ne’ebé komesa Janeiru to’o agora ita rekolla ona rihun $147,777.00, parese iha mudansa kuandu to’o 31 mak ita foin bele hatene loloos,” Xefe Departamentu DRTT Oekusi, Domingos de Almeida relata iha Oekusi, ohin.
Notísia relevante:DRTT Oekusi planu halo leilaun ba motorizada 80
Nia esplika, reseita ne’e arrekada mai husi transporte sira, tantu Angguna, Mikrolete, Tum-tum inpesaun no rejistu foun.
“Orsamentu ne’e rekolla barak husi rejistu transporte sira hanesan karreta no motór sira-neʼebé laiha dokumentu, depois inspesaun karreta, transporte públika hanesan lisensa ba karreta Angguna, Mikrolete no Tum-tum inklui trata karta kondusaun,” nia afirma.
Nune’e, trata karta kondusaun hamutuk 1.306 ho totál orsamentu $24,460.00, trata karta lisensa trajetu hamutuk 766 ho totál orsamentu $12,564.00, DSPL hamutuk 713 ho totál orsamentu $9,985.00.
“Reseita ne’e númeru k’ik, ita kompara ho tinan kotuk 2024, ita rekolla rihun $276,037.00, tanba tinan kotuk ita rejista motorizada sira-ne’ebé laiha dokumentu kuaze 2000-resin, ne’e mak taxa mós aumenta sa’e,” nia hateten.
Notísia relevante:Utiliza la tuir nesesidade, Ekipa konjunta Oekusi halo apriensaun ba viatura Estadu
Jornalista: Abílio Elo Nini
Editór: Rafael Ximenes de A. Belo
