OEKUSI, 21 Jullu 2025 (TATOLI) – Ekipa konjunta komposta husi Diresaun Rejionál Patrimóniu Estadu, Departementu Rejionál Transporte Terrestre (DRTT) Polísia Nasionál Timor-Leste (PNTL) liuhusi sesaun tránzitu, Komisaun Funsaun Públika (KFP) no Provedória Direitu Umanu no Justisa (PDHJ), segunda lorokraik horseik, hala’o pasa-revista ba veíkulu Estadu, karreta no motorizada sira-ne’ebé utiliza la tuir nesesidade ba serbisu Estadu nian.
Notísia relevante: https://tatoli.tl/2022/12/21/ekipa-konjunta-sei-halo-pasa-revista-ba-veikulu-estadu-iha-loron-natal-tinan-foun/
Diretór Rejionál Patrimóniu Estadu Oekusi, Gonzalo dos Remedios Eco, informa, regra ne’ebé fó sai bazeia ba dekretu-lei númeru 80/2022 kona-ba regulamentu viatura Estadu nian, dekretu-lei númeru 6/2003 30 abríl kona-ba kódigu estrada, sirkulár númeru 003/GPM/111/2009 kona-ba jestaun tékniku karreta Estadu, sirkulár númeru 001/GPM/X/2012 kona-ba kontrola movimentu viatura Estadu no padraun prosedimentu operasionál.
Bazeia ba baze legál hirak ne’e, ekipa konjunta aviza ba responsavel lojístika no patrimóniu iha ministériu, institusaun Estadu, serbisu fundu autónoma, autoridade munisipál no administrasaun munisipál hotu atu halo kontrolu másimu ba utilizasaun viatura Estadu diáriamente iha institusaun ida-idak tuir regra no prosedimentu ne’ebé iha, maibé la inklui ba sira neʼebé autorizadu ona ho lei no dekretu-lei sira.
“Ami hala’o operasaun ne’e bazea ba dekretu-lei númeru 80/2022, kona-ba regulamentu viatura Estadu no sirkulár Governu nian, tanba tan ne’e ami ekipa konjunta ne’e presiza kontrolu no fiskaliza movimentu viatura Estadu sira, tanba sasán Estadu nian tenki uza iha oras serbisu de’it,” Gonzalo dos Remedios Eco, informa iha ámbitu seremónia abertura hala’o iha Diretór Rejionál Patrimóniu Estadu, segunda ne’e.
Nia informa, iha loron fim-de-semana, loron sesta lorokraik sai husi serbisu, karreta no motorizada tenke para hotu iha edifisíu nia oin, maibé durante ne’e iha sidadaun balu viola, entaun ekipa konjunta ne’e presiza halo asaun no atividade pasa-revista ne’e, sei hala’o kontinuasaun ba oin, maibé kona-ba kalendáriu ekipa konjunta rejeita fó-sai ba públiku.
“Kuandu ami kaptura ka prende, ne’e orsida nia desizaun ne’e entrega ba kompeténsia idak-idak, exemplu kona-ba kodégu estrada ami sei entrega tomak ba PNTL, ba funsionáriu ami sei entrega PDHJ no Komisaun Funsaun Públika,” nia hateten.
Ofisiál Simu Keixa no Investigasaun iha PDHJ delegasaun territoriál Oekusi, Paulo António Lafo, hateten, PDHJ durante ne’e observa no nota katak servidór Estadu utiliza patrimóniu Estadu la tuir regra no nesesidade serbisu, entaun ekipa konjunta referida, hala’o asaun auto-stop, tanba liga ho dekretu-lei númeru 21/2021, iha artigu 02.o prevista kona-ba subsídiu mensál transporte ba funsionáriu tomak.
“Entaun transporte sira tenke uza tuir oras serbisu, depois ida-ne’e, ita tenke rai iha edifísiu oin, entaun durante ne’e ami observa jerál katak, iha funsionáriu balun no kargu xefia balun prátika jestaun ne’e, tan ne’e ekipa konjunta ne’e halo asaun hodi asegura veíkulu Estadu nune’e labele fó prejuízu ba Estadu liuliu hanesan asesória no mina Estadu nian,” nia dehan.
Notísia relevante: https://tatoli.tl/2023/06/02/ekipa-konjunta-nota-ministeriu-balun-utiliza-viatura-estadu-ba-interese-privadu/
Entretantu, tuir observasaun jornalista Ajénsia Tatoli,I.P iha térrenu nota katak, ekipa konjunta ne’e fahe ba grupu tolu, ida hala’o pasa-revista iha ponte Noefefan, ida iha Mahata ba fronteira Sakato no ekipa ida hala’o pasa-revista iha Samoro.
Tempu ba operasaun ekipa konjunta ne’e hahú halo operasaun iha tuku 05:00 termina iha tuku 07:00 kalan, konsege prende motorizada 10-resin no karreta Estadu ida.
Jornalista: Abílio Elo Nini
Editór: Rafael Ximenes de A. Belo
