OEKUSI, 27 Maiu 2025 (TATOLI) – Departamentu Rejionál Transporte Terrestre (DRTT), Rejiaun Administrativa Espesiál Oekusi Ambeno (RAEOA), sei servisu hamutuk ho Diresaun Patrimóniu Estadu Oekusi, hodi halo leilaun ba motorizada 80, tanba kauze tinan ida ona na’in seidauk koopera atu hasai.
Xefe Departementu Transporte Terrestre Oekusi, Domingos de Almeida, informa motorizada 80 ne’e rejista iha tinan 2024, atu hetan dokumentu legalidade husi Departementu Transporte Terrestre no Autoridade Aduáneiru (AA) Alfandega maibé to’o ohin loron na’in seidauk hasai.
Notísia relevante:Janeiru-Abríl, DRTT Oekusi rekolla reseita rihun $46-resin ba Kofre Estadu
“Motór sira-ne’e, besik 80 na’in seidauk mai foti tanba antes ne’e rejistu ona, hein de’it atu selu iha Alfandega no DRTT atu hasai ona motór tanba tinan kotuk ita fó tempu fulan-neen, atu rejista motór ne’ebé laiha dokumentu, maibé besik tinan ida ona, entaun la kle’ur tan ami sei fó sai aviza atu halo leilaun fali liuhusi patrimóniu Estadu,” nia dehan iha Oekusi, ohin.
Xefe Departementu ne’e, informa katak, parte Transporte Terrestre seidauk define data loloos bainhira mak halo leilaun no sei kontinua fó tempu ba na’in motorizada sira.
“Ami seidauk deklara sai kona-ba nia data fiksu bainhira mak fó sai avizu, husi parte DRTT mós sei kontinua hein, tanba balu sei buka osan, tanba selu ne’e atu hasai motorizada sira-ne’e dalarua, ba DRTT selu $64,00 no Alfandega mós $30,50, ne’ebé ita sei hein kuandu na’in lakohi mai foti ona ami sei anúnsia atu halo leliaun,” nia informa.
Notísia relevante:2024, Diresaun Transporte Terrestre RAEOA arrekada reseita rihun $276 ba kofre Estadu
Notísia relevante:DRTT Oé-Cusse presiza aumenta rekursu umanu no fasilidade
Jornalista: Abílio Elo Nini
Editór: Florencio Miranda Ximenes
