OÉ-CUSSE, 17 Janeiru 2025 (TATOLI) – Husi fulan-Janeiru to’o Dezembru 2024, Departementu Rejionál Transporte Terrestre (DRTT) Rejiaun Administrativa Espesiál Oé-Cusse Ambeno (RAEOA) rekolla reseita ba kofre Estadu hamutuk $276,037.00.
“Orsamentu ne’e rekolla barak husi rejistu transporte sira hanesan karreta no motór sira-ne’ebé laiha dokumentu, depois inspesaun karreta, transporte públika hanesan lisensa ba karreta angguna, mikrolete no tum-tum,” Xefe Departementu DRTT Oé-Cusse Domingos de Almeida, ba Ajénsia Tatoli iha Oé-Cusse, ohin.
Notísia relevante:MTK organiza semináriu kona-ba Transporte Seguru iha Oé-Cusse
Reseita ne’e arrekada liuhusi tratamentu ba transporte sira, ho invoice ka resivu ne’ebé rejista hamutuk 11.801, komposta husi rejistu 3.375 ho totál orsamentu $158,846.00, inspesaun $5.639 ho totál orsamentu $70,182.00.
Nune’e, trata karta kondusaun hamutuk 1.306 ho totál orsamentu $24,460.00, trata karta lisensa trajetu hamutuk 766 ho totál orsamentu $12,564.00, DSPL hamutuk 713 ho totál orsamentu $9,985.00.
“Ita hatene iha 2024 motorizada ne’ebé rejista atu hetan dokumentu 2.000-resin, depois aumenta ho tum-tum, ne’ebé ita kompara taxa ba 2024 bo’otliu tinan hirak ba kotuk,” nia hateten.
Notísia relevante:MTK sei integra DRTT Oé-Cusse ba sistema nasionál atu asesu dokumentu orijinál
Jornalista: Abílio Elo Nini
Editór: Florencio Miransa Ximenes