OÉ-CUSSE, 22 Agostu 2024 (TATOLI) – Ministériu Transporte no Komunikasaun (MTK) hamutuk ho Polísia Nasionál Timor-Leste (PNTL), Departamentu Tránzitu no Seguransa Rodoviáriu Nasionál, organiza semináriu kona-ba Transporte Seguru (Terrestre, Marítima no Aéreu) ne’ebé Inkluzivu ba entidade sira iha Rejiaun Administrativa Espesiál Oé-Cusse Ambeno (RAEOA).
Vise-Grupu Traballu Jéneru no Inkluzaun Sosiál iha MTK, Marçal Pinto, informa katak atividade ne’e atu hasa’e koñesimentu ba alvu sira mak hanesan estudante, ema ho defisiénsia (EhD), autoridade lokál sira, feto potensiál, no joven feto-mane, inklui mós komunidade LGBTI no kondutór no motorista sira.
“Sosializasaun ne’e atu evita engarrafamentu. Ita haree transporte komesa barak, depois estrada sira iha Oé-Cusse di’ak, movimentu transporte la’o bá-mai, entaun oinsá mak estudante no Ema ho Defisiénsia bele asesu ho seguru iha dalan públiku sira, nune’e bele prevene aan husi asidente tráfegu”, Marçal Pinto dehan iha ámbitu semináriu ne’e iha otél Ambeno, ohin.
Notísia relevante: MTK taka stiker ba transporte públiku kona-ba direitu ema ho defisiénsia
Nia dehan, kada tinan, MTK halo sensibilizasaun iha munisipíu sira hodi partilla informasaun ba públiku atu respeita sinál tránzitu no daudaun falta de’it Liquiçá no Manatuto.
Iha fatin hanesan, Xefe Suku Costa, Francisco Colo, rekomenda atu iha futuru bele halo sensibilizasaun bá to’o iha nivél suku no aldeia hodi hasa’e koñesimentu komunidade nian kona-ba utilizasaun transporte no lei sira.
“Ida-ne’e prioridade atu sira bele hatene kle’an kona-ba oinsá atu utiliza espasu públiku hanesan estrada. Kuandu ema komprende entaun ita limita ona asidente sira, tanba hatene ona sinál tránzitu sira”, nia sujere.
Notísia relevante: MTK koordena Autoridade RAEOA atu alarga tán portu Iwao Kitahara Mahata
Jornalista: Abílio Elo Nini
Editora: Maria Auxiliadora
