MTK koordena Autoridade RAEOA atu alarga tán portu Iwao Kitahara Mahata
OÉ-CUSSE, 19 marsu 2024 (TATOLI) – Ministru Transporte no Komunikasaun (MTK), Miguel Marques Gonçalves Manetelu, segunda ne’e observa no koordena Autoridade Rejiaun Administrativa Espsiál Oé-Cusse Ambeno (RAEOA), tanba iha futuru atu alarga tán Portu Iwao Kitahara, Mahata Oé-Cusse.
Notísia relevante: JICA konsulta Autoridade RAEOA kona-bá futuru instalasaun portu
Tanba tuir Nia, daudaun ne’e Governu Timor-Leste liuhosi Ministériu Transporte no Komunikasaun (MTK), servisu hamutuk, ho Ajénsia Kooperasaun Internasionál hosi Japaun (JICA, sigla ingés) hala’o hela estudu viábilidade ba futuru atu dezenvolve-tán Portu Iwao Kitahara Mahata Oé-Cusse.
“Ohin mai iha portu Mahata, atu haree nia kondisaun, no hosi parte MTK atuliza informasaun ba Prezidente Autoridade, kona-bá servisu balun ne’ebé iha futuru mai atu halo alargamentu aumenta-tán portu nia naruk ne’e, agora pasajeiru de’it, maibé ba futuru sei ita konsege ho JICA halo alargamentu-tán, ita-bele fasilita mós kargu sira tula sai sasán sira hosi ne’e ba rai liur no ba nasionál,” Miguel Manetelu, ba jornalista sira iha Portu Mahata.
Nune’e, Ministériu Transporte no Komunikasaun (MTK), sei kontinua servisu hamutuk, no parte JICA hala’o hela estudu viabilidade la’os kompleta ona maibé iha sasán balu presiza kontinua.
“Ida-ne’e tama ba negosiasaun hosi Ministériu Transporte no Komunikasaun ho JICA para hadi’a no alarga tán portu ne’e, no la’ós 100% maibé sira aseita atu halo alargamentu ba portu Mahata,” nia informa.
Notísia relevante: JICA sei halo estudu idrográfika iha Oé-Cusse atu dezenvolve portu Mahata
Iha biban hanesan, Prezidente Autoridade RAEOA, Rogério Tiago Lobato, perante katak, bainhira JICA hahú ezekuta investimentu iha portu Iwao Kitahara Mahata sei laiha afetasaun ba komunidade tanba estudu ne’ebé iha, sei alarga liuhosi parte leste tasi nian.
“Ne’e ha’u sente katak, ideia di’ak tebes rekomendasaun ne’ebé de’it maka mai hosi parte tékniku MTK, ami sei simu tanba hakarak dezenvolvimentu ne’e la’o lais iha Oé-Cusse, bainhira JICA bele mai halo investimentu, ami abertu kompletamente ba proposta ne’ebé ministériu MTK, no halo alargamentu ne’e sei ba parte leste, tanba ne’e laiha impaktu ba komunidade sira-nia to’os no uma hela fatin,” nia katak.
Notísia relevante:Timor-Leste no JICA selebra akordu millaun $7,4 reabilita urjente infraestrutura
Entretantu, atu rekorda fali katak, iha fulan setembru tinan 2023 ekipa tékniku hosi JICA hamutuk ho tékniku sira hosi Diresaun Rejionál Infraestrutura (DRI) halo ona estudu viabilidade no estudu idrográfika ba iha Portu Iwao Kitahara Mahata Oé-Cusse.
Jornalista: Abílio Elo Nini
Editór: Evaristo Soares Martins
