OÉ-CUSSE, 26 setembru 2023 (TATOLI) – Ajénsia Kooperasaun Internasionál hosi Japaun (JICA, sigla inglés), liuhosi ekipa konsultoria ira sei halo estudu idrográfika iha Rejiaun Administrativa Espesiál Oé-Cusse Ambeno (RAEOA) iha futuru atu dezenvolve portu Iwao Kitahara Mahata.
Iha tersa-feira ne’e, ekipa hosi JICA akompaña hosi Diretór Jerál Transporte Komunikasaun, Costantinho Perreira Soares, hala’o ekontru ho Prezidente Autoridade Rejaiun Administrativa Espesiál Oé-Cusse Ambeno (RAEOA), Arsénio Paixão Bano iha salaun Gabinete ZEESM Oé-Cusse.
Notísia relevante: JICA konsulta Autoridade RAEOA kona-bá futuru instalasaun portu
Jestór Transporte no Infraestrutura hosi JICA, Sasa Kenji, informa, objetivu hosi enkontru ofisiál ho Autoridade RAEOA, atu esplika kona-bá, intensaun planu ne’ebé JICA propoin atu dezenvolve portu Iwao Kitahara Mahata iha Oé-Cusse Ambeno.
“Primeira faze ne’ebé ohin ami esplika iha enkontru ofisiál ne’e, katak iha tempu badak nia laran, ekipa konsultoria sira hosi JICA, atu mai halo estudu idrográfika iha portu Iwao Kitahara Mahata, tanba intensaun planu ne’ebé JICA propoin iha futuru atu dezenvolve portu ida-ne’e,” Sasa Kenji, dehan ba jornalista sira.
Tuir nia, tanba bazea ba rezultadu estudu idrográfika ne’e, sei aprezenta mai autoridade RAEOA ho JICA, atubele konsidera, faze tuir mai oinsá mak bele dezenvolve iha portu Iwao Kitahara Mahata iha futuru.
“Tán ne’e ami mós agradese tanba Autoridade RAEOA liuhosi Prezidente Autoridade fó resposta pozitivu, ba proposta ne’ebé, ita propoin katak, ekipa konsultan sira atu mai halo estudu idrográfika iha portu ne’e,” ni orgullu.
Notísia relevante: Timor-Leste no JICA selebra akordu finansiamentu millaun $37,5
Jornalista : Abílio Elo Nini
Editór : Evaristo Soares Martins
