OÉ-CUSSE, 18 marsu 2024 (TATOLI) – Ministériu Transporte no Komunikasaun (MTK) sei integra Departamentu Rejionál Transporte Terrestre (DRTT), Rejiaun Administrativa Espsiál Oé-Cusse Ambeno (RAEOA), ba sistema Nasionál Transporte Trerrestre (DNTT), nune’e bele asesu ona karta kondusaun no livrete ho tipu orijinál hodi lalakon logu ZEESM iha karta kondusaun refere.
Notísia relevante: Motorista Oé-Cusse preokupa karta kondusaun provizória no la vale iha Díli
Ministru Transporte no Komunikasaun (MTK), Miguel Marques Gonçalves Manetelu, hateten, dezde kriasaun RAEOA no ZEESM, iha nasionál la-rekoñese karta kondusaun no livrete ne’ebé prodús hosi transporte terrestre Oé-Cusse nian tanba konsidera provizóriu.
“Iha problema dalaruma maluk sira hosi Oé-Cusse ba Dili atu lori karreta, sira-nia karta kondusaun ne’e, iha Dili lá-rekoñese, ita hanesan nasaun ida Estadu ida-de’it, ita tenke haree ba oin, tan ne’e ho autorizasaun Prezidente Autoridade, ho Sekretáriu Rejionál ne’ebé tutela bá, atu haree, maske emite karta kondusaun xapa matrikula sira no livrete iha Oé-Cusse, maibé di’akliu integra ba sistema nasionál,” Miguel Marques Gonçalves Manetelu, bainhira hala’o vizita iha DRTT Oé-Cusse, segunda ne’e .
Tuir governante ne’e, katak polítika nu’udar preparasaun ba futuru Timor-Leste adere ba ASEAN, nune’e dokumentu hotu tenke orijinál.
“Ohin ha’u hateten, katak 2025 sei ita adere ona ba ASEAN, ASEAN hanoin ona katak, ita só iha karta kondusaun ida, entaun nasaun Timor-Leste, labele iha iha ASEAN labele hatudu karta kondusaun rua, ida hosi rai bo’ot, no ida hosi rai ki’ik, entaun sasán sira-ne’e persiza halo deskusaun para entegra ba sistema nasionál,” nia afirma.
Notísia relevante: DRTT Oé-Cusse prepara blanku no mákina prodús karta kondusaun orijinál iha 2024
Xefe Departamentu Rejionál Oé-Cusse, Domingos de Almeida, konsidera vizita hosi MTK importante, nune’e bele koordena servisu hodi haforsa liután servisu transporte Terrestre nian.
“Vizita ne’e di’ak, atu hametin liután liña koordenasaun servisu durante ne’e ladún la’o, ezemplu durante ne’e ami fó karta kondusaun provizóriu barak maibé seidauk realiza ba karta kondusaun orijinál, tanba apoia sistema data base ba nasionál laiha tanba data sentru ne’e ida de’it, tan ne’e ami agradese vizita ne’e atu fó hanoin di’ak, tanba durante ne’e ita uza de’it karta kondusaun fó ba komunidade provizória seidauk orijinál,” nia agradese.
Notísia relevante:PNTL sei koordena DRTT regula bisikleta elétrika sirkula iha Oé-Cusse
Entretantu, tuir dadus iha DRTT Oé-Cusse daudaun ne’e rejista ona karta kondusaun ho tipu provizória kuaze rihun neen (6000) no prodús ona karta kondusaun orijinál hamutuk 3000.
Jornalista: Abílio Elo Nini
Editór: Evaristo Soares Martins
